Pơma ƀât lêh năm bơ̆ jang kơ Sơnăm vei sơđơ̆ng tơ̆ trong gre 2024, Phó Thủ tướng Trần Lưu Quang pơma hơdăh, sơnăm 2024, rim tơdrong chơ chuĕn yak vih vât roi tŏk athei đei tơdrong adrin đơ̆ng rim anih jang chinh trĭ lơ̆m tơdrong jang ‘nâu. Phó Thủ tướng ăn tơbăt, Trong vă jang lơ̆m sơnăm vei lăng sơđơ̆ng tơ̆ trong gre 2024 đơ̆ng Anih vei lăng sơđơ̆ng trong nơnăm teh đak đei hơnăn “Pơm kiơ̆ Luơ̆t găh tơdrong pơjing tơdrong pơma xa, yak vih vât sơđơ̆ng ‘lơ̆ng”.

Kiơ̆ đơ̆ng noh, Phó Thủ tướng athei dôm Anih tơm, anih jang kơpal, tơring tơrang păng dôm khul jang chinh trĭ tơpôl vang chih pơjing păng tơlĕch trong jang mă lăp hăm hơnăp jang kơdih tơ̆ rim anih jang. Kăl loi ‘nŏh bơ̆ jang pran ‘lơ̆ng, đei yoa tơdrong vei sơđơ̆ng tơ̆ trong gre kơtă lơ̆m năr Têt Nguyên đán Giáp Thìn truh âu kơnh.