Pơma ƀât blŭng jơ pơm lêh, Phó Thủ tướng Trần Lưu Quang tơchĕng ‘lơ̆ng hơnăp jang đơ̆ng Kơchơ Trung Quốc - Nam Á păng Kơchơ tĕch mơdro hăm tĕh đak đe Côn Minh lơ̆m tơdrong tơgŭm ăn tơpôl anih tĕch mơdro Đông Nam Á, Nam Á tơchă tơdrong ‘lơ̆ng vă tơmât jên jang hơdoi, hơtŏk tơdrong tĕch mơdro, tưk tơiung tơdrong jang xa, hơmet pơ ‘lơ̆ng tơdrong pơmat tat, dar dĕh tơiung ming dơ̆ng mŭk drăm đơ̆ng rŏng kơ jĭ Covid-19.

Phó Thủ tướng tơchĕng ‘lơ̆ng hơnăp jang đơ̆ng dêh char Vân Nam lơ̆m tơdrong jang hơdoi hăm Việt Nam păng dôm tĕh đak ASEAN, kiơ̆ dôm trong jang hlôi đei, athei Khul kơdră tĕh đak Trung Quốc păng Khul kơdră pơgơ̆r dêh char Vân Nam hơnơ̆ng tơrĕk, hơtŏk tơdrong jang hơdoi tôm tơdrong, tơguăt kơjăp găh mŭk drăm, tĕch mơdro, chă tơmang lăng đơ̆ng dêh char Vân Nam păng dôm tơring Việt Nam.