Kiơ̆ kơsô̆ chih jô̆ đơ̆ng Anih vei lăng choh jang xa păng atŏk tơiung tơring tơrang apŭng Ia Grai, dêh char Gia Lai, phŭt huơ̆r tơ̆ xăh Ia Krai hlơk păr 2 bơbŭng hnam, pơm hơlŭng truh 1 tân plei sầu riêng oei vă phĕ; Xăh Ia Khai đei 20 tŏ hnam păr bơbŭng păng lơ anih, tơmam yoa nai hư nhen jrăng unh điên, bơbŭng hang lơng... hlŏh 3ha điêu păng dang 700 tơm ‘long cao su păk.

Iŏk đei nơ̆r roi tơbăt, kơdră chĕp kơ̆l Anih vei lăng kon pơlei apŭng Ia Grai, dêh char năm truh tơ̆ dôm xăh păng pơtho ăn khul kơdră pơgơ̆r tơring akŏm khul bơngai jang, dân quân vang tơgŭm ăn kon pơlei hơmet pơ ‘lơ̆ng hiong răm đơ̆ng phŭt huơ̆r.