Ƀok Bùi Ngọc Thanh sơ̆ pơm Kơdră Anih jang Quốc hội jĭ bơngai đei khei ‘năr tơklep hơdai hăm Kơdră Quốc hội Nguyễn Phú Trọng đơ̆ng jăl 11, hăm ƀok Thanh, Kơdră Quốc hội Nguyễn Phú Trọng đei 1 tơdrong arih sa rơ hâu, hiôk chơt, tơpăt ‘lơ̆ng: Chăl Kơdră Quốc hội ‘nao iŏk hơnăp jang, Kơdră vei lăng anih jang păng Kơdră Quốc hội bơ̆jang ‘ngoăih jơ kŭm lơ, ĭnh ƀlŏk khei 8-2006, đei jơ pơgơ̆r pơih blŭng Anih chĕp kơ̆l pơgơ̆r Quốc hội ‘măng hop akŏm mă 42, kŭm tơtăm bơngơ̆t tơdrong jang kơna tơ̆ ‘năr dơ̆ng ĭnh tơ gĕch năm pơma dơnuh dơ̆ng. Mă đơ̆ng chăl doh sơ̆ hơnih bơ̆jang kơ quốc hội oei tôch kơ hrăt hrot, mă lei nhôn oei hơmet ăn hơnih bơ̆jang ăn Kơdră chĕp kơ̆l đei hơnih pơdơh tơ̆ kơ ‘năr dơ̆ng păng đei hơnih sơng tơmoi. Ĭnh truh tơ̆ hơnih pơdơh ‘năr dơ̆ng ‘noh ưh kơ ƀôh Kơdră, năm tơ̆ hơnih sơng tơmoi kŭm ưh kơ ƀôh, năm truh tơ̆ lăm bơ̆jang ĭnh ƀôh Kơdră oei ƀĭch tơ̆ giơng chơ̆p chĕp hla ar, ƀĭch cheng tơchĕng hơlen. Ĭnh apĭnh Kơdră ƀĭch thoi âu ah, liơ ưh kơ ƀĭch tơ̆ lăm pơdơh, ‘noh tă kơ sư đĭ pơ dreo lăm pơdơh đơ̆ng sư vă hơmet ăn 1 hơnih bơ̆jang nai. Mĭnh ‘nu bơngai tôch kơ iơ̆m, tôch kơ rơhâu. Ĭnh đa yua nơ̆r krao ‘noh tơdrong arih sa hmă kơ 1 ‘nu bơngai chĕp kơ̆l gĭt kăl.

Kơlih đơ̆ng tơdrong rơhâu, hiôk chơt kơna tơdrong hơiă đơ̆ng Kơdră so vei lăng Anih jang dôm tơdrong tơpôl kơ Quốc hội Nguyễn Thị Hoài Thu hăm Kơdră Quốc hội Nguyễn Phú Trọng, ‘noh jĭ 1 ‘nu bơngai đei trong pơma sa ‘lơ̆ng đơ̆ng kon pơlei mă đei, đơ̆ng kon pơlei mă tŏk: Lơ̆m dôm ‘măng tơƀơ̆p pơma dơnuh hăm bơngai tăh hla ĭnh tam mă ƀôh lai yơ ƀok Nguyễn Phú Trọng tŏk tơ oei tơ̆ kơ pal đang kơ ‘noh lăng tơ̆ hơla ăn rim bơngai tơtap ti, mă năm đơ̆ng hơla tŏk kơ pal, rôp ti 2 păh trong tang dŏ. Đơ̆ng rŏng ‘noh mă tŏk tơ̆ kơ pal tơ oei mơ̆ng, tơ̆l nơ̆r. ‘Noh jĭ 1 tơdrong pơm, pơma sa kơ sư đơ̆ng kon pơlei mă đei, đơ̆ng bơngai tăh hla mă đei mă ưh kơ sĭ truh vă tơ oei tơ̆ kơpal mă pơgơ̆r.

Đei 2 jăl bơ̆jang kŭm hăm Kơdră Quốc hội Nguyễn Phú Trọng, bơngai tang măt Trần Thị Hoa Ry, Phŏ Kơdră Jơnŭm vei lăng hơdrĕch kon kông kơ Quốc hội ƀlŏk tôch kơ rơđăh tơdrong ưh kơ pơ rŏ đơ̆ng 1 ‘nu bơngai gơh hơgei, ƀĕnh tơdrong ‘lơ̆ng ƀơ̆t iŏk kơ chư̆k jang lơ̆m ‘năr 26 khei 6 sơnăm 2006: Iung pơma iŏk kơ chư̆k pơm Kơdră Quốc hội, ƀok hlôi pơma iŏk 2 nơ̆r pơđơ̆k:“Tơchĕng kơdih kâu, ưh kơ đei hơ nhŏ rŏ lăng kơdih kâu ưh kơ gan hơgei. Kơbăt ning mônh kơnh đei thoi yơ”. Pơma pơđơ̆k vă tơƀôh jơhngơ̆m đon kơdih thoi noh bơ̆n kŭm ƀôh đei tơdrong pơ ‘lơ̆ng ưh kơ pơ rŏ đơ̆ng ƀok ƀơ̆t đei pơjao hơnăp jang gĭt kăl âu kŭm jing nơ̆r pơkă khŏm jang đei păng tơnăp đơ̆ng kơdih hăm Đảng hăm Quốc hội păng hăm kon pơlei.

Dôm bơngai tang măt Quốc hội hlôi bơ̆jang tơ̆ dôm jăl 11 păng 12 adoi đei dôm tơdrong hơiă gĭt kăl hăm Kơdră Quốc hội Nguyễn Phú Trọng. Sơ̆ pơm phŏ Kơdră khŭl tang măt Quốc hội dêh char Thanh Hóa jăl 12 Lê Văn Cuông oei ƀrơ̆k kơ jơhngơ̆m ƀơ̆t tơroi găh dôm ‘măng vei lăng apĭnh jet păng tơl nơ̆r apĭnh jet đơ̆ng Quốc hội Nguyễn Phú Trọng: Mih hlôi asong ĭnh đei apĭnh jet Kơdră tơm truh 3 ‘măng ƀơ̆t ĭnh ưh kơ pă đei apĭnh dơ̆ng ‘noh sư mă pơdơh. Ƀơ̆t ƀôh Kơdră tơm mơ ơ̆ ‘noh mih hlôi pơma tơƀôh vă Kơdră tơm akŏm lơ̆m nơ̆r tơl. Yua thoi noh, ‘măng apĭnh jet đơ̆ng ĭnh đei ƀôh tôch kơ jơnei, hơiă, đei tơpôl răp hơlen chih iŏk lăng ‘lơ̆ng. Mih pơtho tơƀôh hăm 1 trong ‘lơ̆ng păng hơgei păng ưh kơ ƀơ̆r re, pơm tơdrong hiôk ăn kơ dôm bơngai tang măt Quốc hội hơtŏk đei, kŭm pơm tơdrong hiôk ăn kơ đe Kơdră tơm mưh tơl nơ̆r apĭnh kŭm chơ̆n jơhngơ̆m păng tơl nơ̆r, pơđĭ 2 ‘nu tă kơ jơnei pơm ăn kon pơlei lăp đon.

Hăm dôm bơngai tang măt ‘măng mă blŭng vang jang lơ̆m anih jang kon pơlei rơih nhen bơngai tang măt Phạm Nam Tiến, khŭl tang măt Quốc hội dêh char Đăk Nông, Tổng Bí thư Nguyễn Phú Trọng jĭ bơngai jang ‘lơ̆ng vă đe bơngai tang măt Quốc hội lăng kiơ̆: Tổng Bí thư ling lang tơ jê̆, rơhâu, răp mơ̆ng nơ̆r apĭnh, tơgop đơ̆ng bơngai tăh hla păng kon pơlei. Păng mă loi ‘noh Tổng bí thư mưh tơroi nơ̆r tơgop đơ̆ng kơ dih ‘noh ling lang pơm kiơ̆ tôch kơ tơpăt. ‘Noh jĭ tơdrong chĕp vei bưng ai đơ̆ng bơngai chĕp kơ̆l, đơ̆ng bơngai tang măt quốc hội tơ̆ hơnăp kon pơlei, bơngai tăh hla.

Hăm kơ chư̆k jang ‘noh pơm Kơdră Quốc hội jăl 11, 12, Kơdră Quốc hội Nguyễn Phú Trọng ling lang tơklep hăm Quốc hội, hlôh hơdăh găh pơgơ̆r, trong bơ̆jang đơ̆ng Quốc hội păng đei dôm tơdrong hơiă gĭt kăl:

- Kiơ̆ yok đơ̆ng kơdră so, khei 6/2006, mưh jang kơchư̆k Kơdră chĕp pơgơ̆r Kuô̆k hô̆i jăl XI, Kơdră chĕp pơgơ̆r Kuô̆k hô̆i Nguyễn Phú trọng hlôi chĕp pơgơ̆r, pơrô̆ jang tôch tơnăp vă Kuô̆k hô̆i jang keh đang ‘lơ̆ng prăt jăl jang. Lơ̆m mĭnh sơnăm chĕp pơgơ̆r, Kuô̆k hô̆i hlôi pơdrơ̆ng kiơ̆ 13 Khôi luơ̆t, 11 Tơdrong tơchơ̆t, lơ̆m ou đei 3 tơdrong Tơchơ̆t gĭt kăl hlŏh lơ̆m chăl sơnăm, ‘noh Tơdrong tơchơ̆t kĭ tơchơ̆t Tơdrong pơkăp kơthơ vang mơ̆t lơ̆m Tơdrong tơchơ̆t pơjing Khul jang Mơdro sa apŭng plĕnh teh (WTO) kơ teh đak Cộng hòa xã hội chủ nghĩa Việt Nam; Tơdrong tơchơ̆t găh Trong jang pơprŏ tơ iung pơjing hnam Kuô̆k hô̆i; păng Tơdrong tơchơ̆t găh jang kiơ̆ hơnih ming man kăl teh đak khí - điện - đạm Bà rịa - Vũng tàu.

- Jăl jang Kuô̆k hô̆i jăl XII, Kuô̆k hô̆i hlôi pơdrơ̆ng kiơ̆ 67 khôi luơ̆t, 13 tơdrong tơchơ̆t. Lơ̆m ou đei lơ khôi luơ̆t pơjing hơyak pran ăn tơdrong xek tơlang sa pơgơ̆m pơjĭp, pơm glăi đơ̆ng rŏng au nhen Khôi luơ̆t hơmet ming, tơmơ̆t dơ̆ng mĭnh ƀar apăng kơ kơ Khôi luơ̆t Tố tụng hình sự, Khôi luơ̆t hơmet ming, tơmơ̆t dơ̆ng mĭnh ƀar apăng Khôi luơ̆t tơm hình sự, Khôi luơ̆t thi hành án dân sự, khôi luơ̆t Ăn pơnă brŏk hrôih, Khôi luơ̆t vei lăng, iŏk yua mŭk drăm kơ Teh đak...

- Kuô̆k hô̆i jăl XII đei tơdrong tơplih tih tên găh hơmet ming khul jang, atŏk lơ kơdră tang măt joăt jang, rim hơnih bơ̆ jang kơ Kuô̆k hô̆i, đơ̆ng 8 hơnih bơ̆ jang nhen rim jăl jang hơdrol hlôi tŏk truh 10 hơnih bơ̆ jang.

- Vă đĭ jăl jang XII, hăm trong chĕp pơgơ̆r kơtang đơ̆ng Jơnŭm pôk rơih Teh đak, bơngai chĕp kơ̆l ‘noh Kơdră chĕp pơgơ̆r Kuô̆k hô̆i Nguyễn Phú Trọng atŭm hăm khul jang hlôi pơgơ̆r pôk rơih lơ̆m teh đak, ‘măng mă blŭng đei pơgơ̆r adoi pơgơ̆r hrơ̆p mĭnh ‘măng pôk rơih kơdră tang măt Kuô̆k hô̆i (jăl XIII) păng kơdră tang măt Jơnŭm vei lăng kon pơlei 3 kâp (jăl jang 2011-2016) hlôi jơnei keh kong. ‘Măng pôk rơih hlôi pơm dă ƀiơ̆ tơhoach jơ ‘năr, jên hu, jơhngơ̆m đon kơ bơngai tăh hla păng hlôi pơjing đei hơyak pran kơjăp iăp kơtang ăn rim ‘măng pôk rơ̆ih đơ̆ng rŏng ou.

Kơdră Quốc hội Trần Thanh Mẫn pơma hơdăh, Tổng Bí thư Nguyễn Phú Trọng jĭ 1 ‘nu bơngai tôch kơ hơgei, ƀĕnh jơhngơ̆m đon ‘lơ̆ng, yak hloh dôm đon tơchĕng hmă. Hăm 80 sơnăm hơrih, 57 sơnăm Đảng, Ƀok hlôi ‘măn đĭ chăl hơrih sư yua kơ tơdrong ‘lơ̆ng hơiă kơ Đảng, jĭ bơngai  đei jơhngơ̆m đon ‘lơ̆ng kach mang kơ bơngai lĭnh cộng sản, jĭ bơngai jang chĭnh trĭ tôch kơ hơgei, Bơngai lý luận hơgei hloh kơ Đảng, prăt chăl hơrih plang jơhngơ̆m ăn đon tơchĕng rơngei hơdrĕch hơdrŭng păng chủ nghĩa xã hội, yua kơ tơdrong hiôk hian kơ Kon pơlei: Hăm hơnăp jang ‘noh jĭ bơngai chĕp kơ̆l tih hloh kơ Đảng, iŏk jang lơ kơ chư̆k gĭt kăl mă Đảng, teh đak klăih song jang lơ̆m noh đei kơchư̆k pơm Kơdră Quốc hội jăl 11, 12, sư ling lang tơklep hăm Quốc hội, hlôh hơdăh găh pơgơ̆r, trong bơ̆jang đơ̆ng Quốc hội. Sư ling kang tơ tă kơ rim bơngai athei ‘măn jơ năr mă lăp ăn tơdrong jang kơ Quốc hội, athei đei hlôh vao jrŭ, đei tơdrong hlôh băt gĭt kăl găh Quốc hội vă đei dôm nơ̆r tơgop, pơma tơblang ‘lơ̆ng. Sư pơkă: hŏk kon pơlei, hŏk yan âu, trong jang tơgŭm, khôi luơ̆t tơlĕch ăn ‘nĕ kơ hơtăih hăm tơdrong arih sa. Bơ̆n plei nuih tơteh kơ tơdrong arih sa, kơ plei nuih kon pơlei ‘noh tơdrong jang kơ Quốc hội gô hơiă păng đei yua.