Kơsơ̆ năr 30/10, Hơnih mong jên tang găn hơlau Rơka lôch răm châu Á (Hơnih mong jên AIP) iung jang hơdoi hăm Hơnih vei lăng sơđơ̆ng trong gre nơnăm dêh char Gia Lai pơgơ̆r hop akom pơtôch 5 sơnăm jang kiơ̆ tơdrong vă jang “Vơ̆r ngơ ngê̆-Hnam trương sơđơ̆ng ‘lơ̆ng hơ iă” tơ̆ pơlei tơm Pleiku.

Hop akŏm hơlen, đơ̆ng rŏng 5 sơnăm tơlĕch jang kiơ̆ tơdrong vă jang, pơlei tơm Pleiku hlôi jing pơlei tơm ‘lơ̆ng pơm rup ăn tơring hnam trương sơđơ̆ng ‘lơ̆ng hơ iă lơ̆m dêh char păng tơring Tây Nguyên. Kiơ̆ đơ̆ng Hơnih bơ̆ jang vei lăng Trong gre nơnăm Gia Lai, đơ̆ng rŏng 5 sơnăm tơlĕch jang kiơ̆, Pơlei tơm Pleiku hlôi đei 33 hnam trương jăl kơđeh pơjing đei trong yak jơ̆ng, hơnih sơng hŏk tro sơđơ̆ng; rim gre kơdau rĕnh hloh mưh rok găn hloh ‘măng jang hnam trương lơ̆m pơlei tơm ‘noh 30km lơ̆m 1 jơ păng tơ̆ ‘ngoăih pơlei tơm ‘noh 40km lơ̆m 1 jơ. Lơ̆m kơsô̆ au 71% đei sơkơ̆t hơdăh sơđơ̆ng ‘lơ̆ng 5 sao. Tơdrong vă jang au hlôi pơm dă ƀiơ̆ đei tơdrong rơka, lôch răm păng ‘măng gre tơtơ̆m preh dih băl tơ̆ hơnih đei hnam trương hŏk. Hrei au, dêh char jei hlôi pơprŏ trong jang hơmet ming 56 hnam trương hŏk tôch môch trong glung lơ̆m dêh char lơ̆m khei năr au kơnh păng lăng truh tơlĕch jang kiơ̆ jơ̆p lơ̆m dêh char, mă kăl ‘nŏh rim tơring atăih yăih.