Pơma tơ̆ jơ hôp, ƀok Hoàng Minh Nhân, Kơdră Khul jang tơbôl Việt – Nga plt HCM pơđou dơ̆ng dôm tơdrong gĭt kăl lơ̆m jơhnơr arih sơ̆ - “10 năr pơm dơdrŏ apŭng plenh tĕh” đơ̆ng Kăch mang khei 10 Nga. Tơ̆ Việt Nam, Kach mang khei 10 Nga đei năng tôch gĭt kăl, ƀơm truh tôch tih hăm tơdrong jang kăch mang păng tơdrong jang tŏk đơ̆ng rŏng kơ đơ̆ng tĕh đak. Atŭm hăm ‘nŏh pơjing đei kơmŏng tôch kơjăp ăn tơdrong pơvei ‘lơ̆ng hơiă đơ̆ng 2 hơdrĕch Việt - Nga.

Ƀok Valery Mikhailovich Karchagin, Kơdră Anih tang măt ăn tĕh đak Nga tơ̆ plt HCM tơroi: Đơ̆ng rŏng kơ lêh âu, sư tơƀôh ăn dôm kơjă kăp gĭt đơ̆ng hơdrĕch Nga – jơhngâm đon ‘mêm kơ tĕh đak, tơdrong vang yak hơdai vă vei lăng tơdrong rơngei hiôk hian păng chĕp kơ̆l pơgơ̆r kơdih. Kiơ̆ ƀok Valery Mikhailovich Karchagin, teh đak Nga tơchĕng ‘lơ̆ng tơdrong tơgŭm đơ̆ng dôm tĕh đak boăl juăt, ‘nhŏng ŏh, mă loi jĭ kon pơlei Việt Nam.