Lơ̆m hnam kơ jăp ‘lơ̆ng ‘nao đei man asong ăn, ŭnh hnam ƀok Rơ Lan Đếu oei tơ̆ plei Bó, xăh Ia Kly, apŭng Chư Prông chơt hơiă sơng mih ma duch nă jê̆ hơtăih truh năm ngôi. Nơ̆r pơma hiơ hiĕk jơ̆p lơ̆m hnam ‘nao, păr ang tơdrong chơt hơiă ngôi hơdai. Đơ̆ng dang ei, ŭnh hnam sư đĭ đei hơnih oei sa hơđơ̆ng tơpă ƀơ̆t đei hnam oei hăm pơđĭ hloi hơnih pai gŏ hiôk, hnam chă pơyơ̆ng, cham rơhơi păng ‘măng dur kơjăp.

Hnam ƀok Đếu ‘noh jĭ 1 lơ̆m hloh 1.000 tŏ hnam găh tơdrong jang sut hnam pơgia, hnam hiah hiok tŏk bŏk đei tơlĕch jang lơ̆m apŭng Chư Prông lơ̆m sơnăm 2025. Ƀok Rơ Lan Đếu ƀrơ̆k jơhngơ̆m roi tơbăt, hnam ‘nao ‘noh jĭ tơdrong tơgop băl đơ̆ng lơ jơhngơ̆m đon, đơ̆ng kơtum kơtŏng, ‘nhŏng oh truh Mặt trận Tổ quốc, dôm khŭl grŭp chĭnh trĭ - tơpôl păng khŭl ƀô̆ đô̆i tơring:

“Ĭnh chhôk dêh. Apĭnh bơnê kơ đe kơdră kơpal hlôi tơgŭm jên, năr jang ăn ŭnh hnam nhôn mĭnh pôm hnam man să sap. Dang ei đei hnam bơih, ŭnh hnam gô hơdrin jang sa vă yak tŏk”.

Tơ̆ apŭng Chư Prông- tơring đei kơsô̆ hnam hiah hiok kăl kơ sut lơ hloh dêh char Gia Lai, trong hơvơn roi năr jang đơ̆ng tơ ‘ngla hnam hơdai hăm tơdrong vang tơgŭm đơ̆ng rim khŭl jang chĭnh trĭ - tơpôl hlôi tơgŭm hơmet ‘lơ̆ng jên jang păng tŭn hrĕnh tơdrong ming man. ‘Nâu kŭm jing tơdrong jang đei apŭng tơmơ̆t yua vă bơ̆jang kiơ̆ hrĕnh tơdrong jang, tơgŭm kon pơlei jăh đei hnam ‘nao ‘lơ̆ng, kơjăp. Kŭm trong jang lei lăi thoi noh mơ̆n, apŭng Phú Thiện hlôi kơchăng tơlĕch jang hrơ̆ch. Tơring răt tơmam ming man atŭm hăm kơsô̆ lơ vă tơ jur kơjă, đơ̆ng rŏng ‘noh klăih song ăn rim xăh. Tơdrong jang ming man đei pơgơ̆r ‘lơ̆ng, hơvơn khŭl grŭp man hơgei jang tơm, kon pơlei vang jang tơgŭm.

Gơnang đơ̆ng noh, truh dang ei, apŭng hlôi jang đang trong tơlĕch jang, jang đang hơdrol khei ‘năr pơkăp mă Khŭl pơgơ̆r jang dêh char pơjao ăn; vei sơđơ̆ng Kon pơlei đei hnam kơjăp mă oei kiơ̆ tơdrong ‘lơ̆ng so. Yă Nay HDoănh, xăh Ia Piar, apŭng Phú Thiện vang tơroi tơdrong chơt hơiă ƀơ̆t pơ dŭ hơmet tơmam vih tơ̆ hnam ‘nao:

“Ŭnh hnam nhôn bơnê kơ Đảng, teh đak păng rim kơdră lơ dêh. Dang ei đei hnam ‘nao, hơđơ̆ng jơhngơ̆m jang sa, vei lăng, bơngơ̆t ăn kon hơ ‘lơ̆p bơih”.

Sơnăm 2025, jang kiơ̆ athei kơtang đơ̆ng Thủ tướng teh đak, Gia Lai tơlĕch tơdrong tơm sut 8.485 tŏ hnam pơgia, hnam hiah hiok. Lăp ƀơ̆t tơdrong jang ‘nao tơlĕch jang, Khŭl pơgơ̆r jang păng Grŭp tơgŭm tơdrong jang đei pơjing, pơgơ̆r jang truh rim tơring, anih jang. Gơnang đơ̆ng ‘noh, tơdrong jang sơng đei tơdrong vang jang ‘lơ̆ng đơ̆ng kơdră đảng, kơdră tơring, khŭl grŭp, ƀô̆ đô̆i. Mă loi ‘noh jĭ Kŏng an dêh char hlôi hơdrin tơgop jên, năr jang, jang hơdai hăm khŭl kơdră, Mặt trận Tổ quốc, khŭl grŭp păng Kon pơlei tŭn hrĕnh bơ̆jang. Thiếu tướng Rah Lan Lâm- Kơdră vei lăng Kŏng an dêh char, Kơdră Khŭl pơgơ̆r jang tơdrong jang sut hnam pơgia, hnam hiah hiok Kŏng an dêh char Gia Lai roi tơbăt:

“Kơdră Đảng Kŏng an dêh char hlôi tơlĕch jang đei yua. Kang ƀô̆, khŭl lĭnh hlôi tơgŭm 1 năr jên khei, tơgop hloh 3 ti hlak jên. Hơdai hăm tơgop năr jang, jang hơdai kơjăp hăm dôm anih jang, tơring, tơlĕch jang ‘lơ̆ng tơdrong jang, hơnhăk ăn lơ tơdrong hơiă lơ̆m jơhngơ̆m Kon pơlei”.

Hăm jơhngơ̆m pran akŏm kŭm hăm lơ trong pơcheh jang, truh dang ei dêh char hlôi iŏk đei hloh 82% trong tơlĕch jang pơm tơm bơ̆jang păng 42% trong tơlĕch pơjao ăn. 7/17 tơring hlôi jang đang trong tơlĕch jang ‘noh đei: pơlei tơm Pleiku, Thị xã An Khê, Thị xã Ayun Pa, dôm apŭng Đăk Pơ, Đức Cơ, Krông Pa păng Phú Thiện. Dôm tơring nai kŭm tŏk bŏk hơdrin hơtŏk hrĕnh jang đang tơdrong jang. Ƀok Đinh Văn Dũng, Bí thư Đảng apŭng Chư Prông pơma hơdăh khŏm jang đơ̆ng tơring kŭm jing khŏm jang đơ̆ng dêh char, jang đang tơdrong jang hơdrol pơyan ‘mi  sơnăm ‘nâu.:

“Đĭ đăng hnam tă kơ man ƀlep tơdrong hơgăt ngăl, să đơ̆ng 36 m² tơ̆ kơpal. Lơ ŭnh hnam tơchă dơ̆ng jên pơm hnam 60 – 70 m², đei tôm bơ̆n pơgar, ‘măng dur, cham, hnam gŏ, hnam chă pơyơ̆ng. Truh ‘năr 30/6, nhôn gô jang đang pơđĭ 997 tŏ hnam man ‘nao, vei sơđơ̆ng đĭ đăng bơngai đei hnam kơjăp, mă loi ‘noh jĭ ŭnh hnam dơnuh hin, vă jê̆ dơnuh hin, hơtŏk ‘lơ̆ng tơdrong hơrih sa Kon pơlei”.

 Tơdrong hơdrin, pơcheh hơgei lơ̆m tơlĕch jang tơdrong jang sut hnam pơgia, hnam hiah hiok tơ̆ Gia Lai hlôi hơnhăk ăn đei yua ‘lơ̆ng. Mĭnh tơdrong jang kach mang găh hnam oei ăn ŭnh hnam dơnuh hin hlôi vă jê̆ năr jang đang, tơgŭm um ai tơring tơrang, mă loi ‘noh jĭ tơring kon pơlei kon kông dêh char Gia Lai roi ‘năr roi ‘lơ̆ng, tơplih ‘nao.