Pơdong, ƀŭ 16 kơ̆l linh lôch tang teh đak đei sir chă, chơ brŏk đơ̆ng teh đak Lào păng Campuchia
Thứ sáu, 08:51, 07/06/2024
VOV Tây Nguyên/Dơ̆ng tơblơ̆
VOV Tây Nguyên/Dơ̆ng tơblơ̆
VOV4.Bahnar - Pơgê brei (6/6), tơ̆ pơsat linh lôch tang teh đak apŭng sơlam Ngọc Hồi, Anih chĕp kơ̆l đảng dêh char, Jơnŭm pơgơ̆r kon pơlei, Anih vei lăng kon pơlei, Anih MTTQ Việt Nam dêh char Kon Tum pơm lêh pơdong păng ƀŭ hơmet 16 kơ̆l linh lôch tang teh đak ‘nŏh jĭ đe linh, bơngai jang tơgŭm đơ̆ng Việt Nam lôch tang lơ̆m tơdrong tơblăh tơ̆ teh đak Lào păng Campuchia yoa Khul K53 dêh char Kon Tum sir chă, chơ tơvih lơ̆m pơyan phang âu ki.
Pơre nơ̆r lơ̆m jơ pơm lêh, yă Y Ngọc, Phŏ Kơdră vei lăng kon pơlei dêh char Kon Tum tơƀôh đon kŭp yom tôch ai păng ‘mêm bơnê tôch pơneh hăm đe linh lôch tang teh đak – dôm bơngai kon hơ ‘lơ̆p gơh hơgei kơ hơdrĕch hơdrung Việt Nam iung tơblăh nuih mơng, chu lôch tang ăn tơdrong tơblăh iŏk rơngei hơdrĕch hơdrung păng mĭnh jơhngâm đon bơ̆ jang yoa apŭng plenh teh.
Lơ̆m 16 kơ̆l linh lôch tang teh đak mă Khul K53 dêh char Kon Tum sir chă đei ‘nŏh đei 1 ‘nu linh băt hơdăh hơnăn ‘nŏh jĭ linh Đoàn Thanh Long, rơnĕh sơnăm 1926, pơlei tơ̆ xăh Điện Quang, apŭng Điện Bàn, dêh char Quảng Nam. Anih pơgơ̆r jang kơ dêh char Kon Tum hlôi pơjao kơting linh âu ăn unh hnam păng khul kơdră tơring pơgơ̆r pơdong, ƀŭ hơmet.
Viết bình luận