Lơ̆m pơgê au, Hơnih bơ̆ jang Khul kơdră chĕp pơgơ̆r Kuô̆k hô̆i ăn tơgop nơ̆r găh trong vă pơjing Khôi luơ̆t Mong răk (hơmet ming). Khôi luơ̆t Mong răk đei tơlĕch jang đơ̆ng sơnăm 2011 hlôi pơjing đei trong jang kăl vă bơ̆ jang mong răk lơ̆m teh đak iung jang lei lăi dih băl.

Jei lơ̆m năr au, Hơnih bơ̆ jang Khul Kơdră chĕp pơgơ̆r Kuô̆k hô̆i ăn tơgop nơ̆r găh tơdrong vă pơjing Khôi luơ̆t bơ̆ jang Hơnih xek tơlang kon pơlei (hơmet ming); ăn tơgop nơ̆r găh tơdrong hơmet ăn ‘măng hop akŏm mă 6 kơ Kuô̆k hô̆i. Hơnih bơ̆ jang Khul kơdră chĕp pơgơ̆r Kuô̆k hô̆i jei lăng hơlen rim hla bơar chih tơbăt tơdrong bơ̆ jang đơ̆ng Khul kơdră Teh đak, Hơnih xek tơlang tơm, Hơnih bơ̆ jang dăr lăng hơlen tơm, Hơnih hơlen jên hu Teh đak păng hla bơar chih tơbăt đơ̆ng Tổng Thư ký Kuô̆k hô̆i găh chih akŏm dôm tơdrong jang dăr lăng găh jang kiơ̆ mĭnh ƀar tơdrong tơchơ̆t đơ̆ng Kuô̆k hô̆i jăl XIV găh dăr lăng rim tơdrong jang tơm, nơ̆r apĭnh jet tơl hơdăh păng tơdrong tơchơ̆t đơ̆ng Kuô̆k hô̆i găh dăr lăng dôm tơdrong tơm, apĭnh jet đơ̆ng blŭng jăl jang XV truh ‘măng hop akŏm mă 4.