Hop akŏm pơgơ̆r lơ̆m 3 năr, tơ̆ hop akŏm âu, Anih chĕp kơ̆l pơgơ̆r Quốc hội vă hơlen năng, tơgop nơ̆r ăn lơ tơdrong gĭt kăl. Găh tơdrong chih pơjing luơ̆t, tơ̆ hop akŏm mă 28, Anih chĕp kơ̆l pơgơ̆r Quốc hội vă tơgop nơ̆r ăn Tơdrong chih pơjing nơ̆r hơgăt găh jên nôp mưh tơkêng; hơlen năng, pơdrơ̆ng nơ̆r ăn Tơdrong tơchơ̆t tơl tơblang tơ̆ Hop akŏm Anih vei lăng hơdrĕch kon kông, Anih jang kơ Quốc hội; hơlen năng, athei chih tơmât dơ̆ng 1,2 tơdrong mưh chih pơjing luơ̆t, tơdrong tơchơ̆t sơnăm 2024...

Găh tơdrong dăr lăng, Anih chĕp kơ̆l pơgơ̆r Quốc hội hơlen năng hla ar chih tơroi găh tơdrong ‘mĕh vă đơ̆ng kon pơlei kơ Quốc hội khei 10 păng khei 11/2023; hơdai hăm ‘nŏh, Anih chĕp kơ̆l pơgơ̆r Quốc hội hơlen năng 2 tơdrong kăl, đei: Tơdrong pơtruh, hơmet ming trong tơlĕch jên jang đơ̆ng trung ương sơnăm 2023 kơplăh dôm anih tơm, anih jang kơ trung ương păng tơring; tơdrong hơgăt jên jang ăn Tơdrong jang tơiung ming păng jang tŏk mŭk drăm, tơpôl, hơmet ming trong tơmât jên jang đunh păh lăp đơ̆ng jên trung ương iŏk đơ̆ng sơnăm 2021 – 2025 tơ̆ dôm anih tơm, anih jang kơ trung ương păng tơring.