Iung pơma tơ̆ pơgơ̆r blŭng hop akŏm, Kơdră chĕp pơgơ̆r Kuô̆k hô̆i Trần Thanh Mẫn tơbăt, tơ̆ hop akom ou, Hơnih bơ̆ jang Kuô̆k hô̆i ăn tơgop nơ̆r 6 tơdrong, lơ̆m ou đei hop akŏm pơtôch, hơlen ming ‘măng hop akŏm mă 7 păng pơma dơnuh găh bơ̆ jang hơmet ăn ‘măng hop akŏm mă 8, Kuô̆k hô̆i jăl XV pơgơ̆r lơ̆m khei 10 kơnh. Mă kăl, Hơnih bơ̆ jang Kuô̆k hô̆i tơchơ̆t 2 tơdrong găh bơ̆ jang jên hu, kon jên jang teh đak ‘noh đei: Tơdrong tơmơ̆t dơ̆ng kon jên jang kơ hơnih mong jên bơ̆ jang teh đak sơnăm 2024 kơ Hơnih tơm Ƀô̆ đô̆i vei lăng sơlam teh đak, Hơnih tơm Kŏng ang. Tơdrong hơmet ming trong pơprŏ teh đak tơmơ̆t jang hăm kon jên jang Trung ương jăl jang 2021-2025 kơ Hơnih tơm, hơnih bơ̆ jang Trung ương păng tơring; pơm keh đang hla bơar tơmơ̆t jên jang rim tơdrang vă jang hơmet ăn jang sa iŏk yua kơjăp, kăt tơjur, pơkom tơlĕch kon jên bơ̆ jang Trung ương sơnăm 2021 oei rơkăh lăp đơ̆ng rŏng jang kiơ̆ trong jang tơgŭm djru jên hu mơng hnam ăn bơngai jang kơ Tơdrong jang hơmet ming păng atŏk tơ iung mŭk drăm-tơpôl.