Hăm nơ̆r pơma “tơmơ̆t kơtŏh pham Việt”, sơnăm au, tơdrong jang au đei pơgơ̆r lơ̆m 2 khei tơ̆ 48 dêh char, pơlei tơm lơ̆m Teh đak.

Tơ̆ Đăk Lăk, ‘nau jing sơnăm mă 10 pơgơ̆r plang ăn pham hăm sơng iŏk đei 500 tơpu pham, adoi chă pơrô̆ tơbăt ăn jơhnơr pơlôh băt tơdrong jĭ pham sang đơ̆ng nge adoi nhen trong tang găn tơdrong jĭ au. Tơdrong pơgơ̆r tơ̆ Đăk Lăk hlôi đei lơ kon pơlei vang năm, ưh khan lăp hơdrô̆ kon pơlei lơ̆m tơring kơdrơ̆m mă lei truh kon pơlei tơring atăih yăih hloi. Hlŏh đơ̆ng au măh mai pham chă pơtruh ăn ming hơmet jĭ ăl, xek tơlang tơdrong kơƀăh pham lơ̆m khei năr lêh têt. ‘Moi kiơ̆ tơdrong jang au vă pơrô̆ pơrôp pơtho tơbăt ăn kon pơlei hlôh vao trŏ ƀlep găh plang ăn pham păng vang plang ăn pham. Đơ̆ng noh, pơjing đei khul vang plang ăn pham păng hơvơn kon pơlei vang plang ăn pham dŏng hơrih dôm bơngai jĭ ăl.