Vang năm Hop akŏm đe hơ ioh teh đak ‘măng mă 7 (pơgơ̆r đơ̆ng năr 5 truh năr 8/8) ‘noh 188 ‘nu hơ ioh đơ̆ng lơ tơring lơ̆m teh đak. Đe oh ‘nŏh dôm bơngai hŏk gơ̆h hơgei, đei rơ̆ih iŏk đơ̆ng 43 dêh char, pơlei tơm, hơnih jang, tang măt ăn 25 triu ‘nu hơ ioh lơ̆m teh đak vang năm hop akŏm.

Tơ̆ hop akŏm đe hơ ioh teh đak ‘măng mă au, rim đe oh hlôi tơƀơ̆p, pơma dơnuh păng tơbăt jơhngơ̆m đon kơdih păng pơtruh jơhngơ̆m đon hơpơi ‘meh vă đơ̆ng bôl boăl tơ̆ tơring kơdih oei sa, tơ̆ hnam trương kơdih ăn kơdră chĕp pơgơ̆r găh dôm tơdrong kơ đe hơ ioh.  5 tơdrong tơm đei rim đe oh chă pơma dơnuh, tơlĕch nơ̆r apĭnh, athei vă bơngai ‘lŏ kră gơ̆h chă tơgŭm djru ăn đe sư nhen: Vang iung jang tang găn tơdrong hil hơreh teh rơvĕnh đe hơ ioh; vang iung jang tang găn tơdrong kơra, glơ̆k kơ đak, sar bar trong nơnăm; Vang iung jang vei lăng năng tông đe hơ iŏh găh mạng; vang iung jang tang găn tơplih tŏ ‘mi kial, pơrang jĭ, tŏ ‘mi kial pơrăm; Vang iung jang tang găn hơ ioh chă jang glăi hăm tơdrong tơchơ̆t kơ khôi luơ̆t păng rim tơdrong anai mă rim đe oh lăng truh.