Pơgê 24/8, tơ̆ Hnam hôp plt Hải Phòng (kơsô̆ 18 Hoàng Diệu, kuơ̆n Hồng Bàng, plt Hải Phòng), Khul kơdră chĕp kơ̆l Trung ương Đảng, Quốc hội, Kơdră tĕh đak, Khul kơdră tĕh đak, Anih Trung ương Mặt trận Tổ quốc Việt Nam păng unh hnam pơgơ̆r Lêh hơpong, pơdong tih ăn nhap ƀok Lê Văn Thành, Kơdră jang lơ̆m Trung ương Đảng, Phó Thủ tướng tĕh đak kiơ̆ trong pơgơ̆r pơdong kơ tĕh đak. 

Bong tăh hơkâu nhap Phó Thủ tướng Lê Văn Thành đei kruh Hla Kơ tĕh đak, ming ƀât anih đei pơrŏ tôch ‘lơ̆ng lơ̆m Hnam hôp plt Hải Phòng. Pơih blŭng lêh mât hơpong, Khul tang măt ăn Khul kơdră chĕp kơ̆l Trung ương Đảng mât hơpong păng tơƀôh jơhngâm đon sơ ‘ngon kŭm hăm hnam tơnŏ Phó Thủ tướng Lê Văn Thành. Đơ̆ng rŏng kơ ‘nŏh, jĭ Khul hơpong đơ̆ng Ƀok Kơdră tĕh, khul hơpong kơ Khul kơdră tĕh đak, Khul hơpong kơ Quốc hội, Khul hơpong đơ̆ng Anih Trung ương Mặt trận Tổ quốc Việt Nam mât hơpong nhap ƀok Lê Văn Thành.

Truh hơpong nhap Phó Thủ tướng oei đei Kơdră chĕp kơ̆l Đảng, Tĕh đak adrol sơ̆, dôm khul tang măt ăn dôm Anih tơm, anih jang kơpal, khul grŭp tơ̆ Trung ương păng dôm tơring; dôm khul jang tơbôl, bôl boăl lơ̆m apŭng plenh tĕh. Lêh pơdong Phó Thủ tướng Lê Văn Thành vă pơgơ̆r ƀât 7 jơ, ‘năr 26/8; Lêh tung ƀŭ nhap Phó Thủ tướng vă pơgơ̆r hơdai lơ̆m năr tơ̆ Pơsat plei ƀok lơ̆m xăh Tân Liên, apŭng Vĩnh Bảo, plt Hải Phòng.