Năr ou, năr 25/7, Khul kơdră chĕp pơgơ̆r Trung ương Đảng Cộng sản Việt Nam, Kuô̆k hô̆i Teh đak Cộng hoà Xã hội Chủ nghĩa Việt Nam, Kơdră chĕp pơgơ̆r Teh đak Cộng hoà Xã hội Chủ nghĩa Việt Nam, Khul kơdră chĕp pơgơ̆r teh đak Cộng hoà Xã hội Chủ nghĩa Việt Nam, Hơnih bơ̆ jang Trung ương Mặt trận Tổ quốc Việt Nam hăm ŭnh hnam vang pơgơ̆r pơm lêh yôk Tổng Bí thư Ban Chấp hành Trung ương Đảng, Bí thư Quân uỷ Trung ương Nguyễn Phú Trọng. Pơdong groong ƀŭ Tổng Bí thư Nguyễn Phú Trọng đei pơgơ̆r kiơ̆ trong Teh đak pơdong groong ƀŭ. Khul chĕp pơgơ̆r pơdong groong ƀŭ đei 35 ‘nu kơ yuơ Kơdră chĕp pơgơ̆r Teh đak Tô Lâm pơm kơdră khul. Khul pơgơ̆r pơdong groong ƀŭ đei 27 ‘nu, kơ yuơ Kơdră jang lơ̆m Hơnih tơm Chinh trĭ, Kơdră Ban Bí thư Lương Cường pơm Kơdră khul. Pơm lêh năm hơpong Tổng Bí thư Nguyễn Phú Trọng đei pơgơ̆r tơ̆ Hnam pơdong groong ƀŭ Teh đak kơsô̆ 5 Trần Thánh Tông, pơlei tơm Hà Nội, iŏk đơ̆ng 7 jơ pơgê truh 10 jơ gơmăng năr 25/7/2024 păng đơ̆ng 7 jơ pơgê truh 1 jơ kơsơ̆ năr 26/7/2024. Pơm lêh năm hơpong Tổng Bí thư Nguyễn Phú Trọng đei pơgơ̆r lơ̆m jơ ‘năr ou tơ̆ Hnam hop akŏm Thống Nhất, pơlei tơm Hồ Chí Minh păng tơ̆ pơlei pơla ƀok tơring Đông Hội, apŭng Đông Anh, pơlei tơm Hà Nội. Kiơ̆ tơbăt hơdăh, Khul chĕp pơgơ̆r Pơm lêh pơdong groong ƀŭ gô pơjing rơvơn, hơmet jơ ‘năr ăn kon pơlei mơ̆t hơpong Tổng Bí thư Nguyễn Phú Trọng. Mưh năm hơpong, kon pơlei chĕp ba kơtheh kăn kươk đei kơchip điên tư dăh mă điên thoăi đei kai tơmơ̆t VNeID kĭch hoat mă 2 vă pơchrang mã QR. Kŏng ang pơlei tơm Hà Nội hlôi hơmet dôm tơdrong kăl hloh tơ̆ rim hơnih pơlăp kmăi pơchrang mẵ QR vă tơgŭm ăn kon pơlei pơchrang mã QR ƀônh ƀŏ mưh truh năm hơpong Tổng Bí thư Nguyễn Phú Trọng. Ŭnh hnam Tổng Bí thư Nguyễn Phú Trọng bơnê kơ đĭ đăng kon pơlei, kang ƀô̆ lơ̆m teh đak păng bôl boăl apŭng plĕnh teh hlôi pơtruh nơ̆r vang gơ̆h sơ ‘ngon Tổng Bí thư Nguyễn Phú Trọng lôch hơchăng. Radiô Nơ̆r Pơma Việt Nam (VOV) rapor kơtă Pơm lêh Năm hơpong Tổng Bí thư Nguyễn Phú Trọng păng tơdrong rapor gĭt kăl "Tổng Bí thư Nguyễn Phú Trọng: Bơngai kơ kon pơlei, Bơngai kơ chăl sơnăm" đei rapor đơ̆ng 6h50 pơnĭt truh 9h15 pơnĭt năr 25/7/2024 lơ̆m ƀăng brŏ rapor VOV1, VOV2, VOV3; pơdăh tivi kơtă lơ̆m kênh pơbăh tivi VTC1, VOVTV; pơdăh trư̆k tuyên lơ̆m ƀăo Điên tư VOV, VTC News păng rim kênh lơ̆m mạng tơpôl.

Rup Pơm lêh pơdong ƀok Tổng Bí thư Nguyễn Phú Trọng