Pơgê 26/12 tơ̆ Hà Nội, Hop akŏm bơngai tang măt lơ̆m teh đak Khŭl kon pơlei jang chŭn mir Việt Nam ‘măng mă VIII, jăl jang 2023-2028 pơgơ̆r pơih blŭng tơ̆ Hơnih Hop akŏm tơm teh đak Mỹ Đình. Tổng Bí thư Nguyễn Phú Trọng truh akŏm păng đei ƀai iung pơma pơgơ̆r gĭt kăl tơ̆ Hop akŏm. Hăm hơnăn "Tơgoăt tơgoăl - Kon pơlei pơm tơm - pơcheh hơgei - Jang hơdai - Hơtŏk tơiung” Hop akŏm Khŭl kon pơlei jang chŭn mir Việt Nam ‘măng mă VIII đei tơdrong tơgop muh măt đơ̆ng vă jê̆ 1 rơbâu ‘nu bơngai tang măt tơpă, tang măt ăn hloh 10 triệu ‘nu bơngai jang, kon pơlei jang chŭn mir kơ lơ̆m teh đak. Tơ̆ Hop akŏm, dôm bơngai tang măt akŏm pơma dơnuh, ăn tơgop nơ̆r lơ̆m hla ar chih ming dôm hla ar gĭt kăl, ‘noh đei: Hla ar chih tơroi tơbăt chĭnh trĭ đơ̆ng Anih chĕp kơ̆l pơgơ̆r  Trung ương Khŭl kon pơlei jang chŭn mir Việt Nam jăl VII; hla ar chih tơroi tơbăt hơlen lăng đơ̆ng Anih chĕp kơ̆l pơgơ̆r Trung ương Khŭl kon pơlei jang chŭn mir jăl VII; Hla ar chih ming Tơdrong pơkăp Khŭl kon pơlei jang chŭn mir Việt Nam (tơmơ̆t dơ̆ng, hơmet ming). Hop akŏm kŭm pơma dơnuh tơchơ̆t trong vă jang, hơgăt, hơnăp jang ăn pơđĭ jăl jang; pôk Khŭl chĕp kơ̆l pơgơ̆r jăl jang 2023-2028. Lơ̆m jơnăr Hop akŏm kŭm gô pơgơ̆r 10 hop akŏm pơma dơnuh tơdrong jang vă tơlĕch tơdrong pơcheh hơmet pơ ‘lơ̆ng dôm tơdrong tih tơlĕch ăn hăm tơdrong jang đơ̆ng Khŭl vei lăng kon pơlei jang chŭn mir Việt Nam, chih iŏk dôm nơ̆r tơgop, apĭnh vă akŏm, chih iŏk lơ̆m hla ar kăl Hop akŏm.

Iung pơma pơgơ̆r hop akŏm, Tổng Bí thư Nguyễn Phú Trọng athei, rim kơdră Khŭl kon pơlei jang chŭn mir lơ̆m teh đak kăl kơ hơnơ̆ng tơplih ‘nao pran kơtang hloh dơ̆ng tơdrong jang, trong jang, hơtŏk ‘lơ̆ng, đei yua tơdrong jang đơ̆ng khŭl; pơjing Khŭl kon pơlei jang chŭn mir Việt Nam roi ‘năr roi pran kơjăp, tơpă jing khŭl jang tang măt ăn tơdrong gơh jang, đei yua trŏ luơ̆t, ƀlep đơ̆ng kon pơlei jang chŭn mir; hơtŏk mă ‘lơ̆ng hơnăp jang ‘noh tơm, dơnơm ăn tơdrong jang kon pơlei jang chŭn mir, jĭ gơng tơƀưh đơ̆ng kon pơlei jang chŭn mir hăm Đảng, teh đak; jĭ bơngai jang ‘lơ̆ng lơ̆m grŭp tơgoăt tơgoăl đĭ đăng hơdrĕch hơdrŭng, jang hơdai “kŏng nhân - kon pơlei jang chŭn mir - gơh hơgei”.