Iung pơma tơ̆ hop akŏm, Thủ tướng Campuchia Hun Manet pơma hơdăh gô hơnơ̆ng hơmet ming hơnih tơmơ̆t jên jang tĕch mơdro hăm dôm trong jang tơm, ‘lơ̆ng vă vei sơđơ̆ng dôm bơngai tơmơ̆t jên jang sơđơ̆ng jơhngơ̆m tơmơ̆t jên jang tơ̆ Campuchia. Khŭl kơdră teh đak Campuchia kŭm gô hơdrin vă pơm hiôk hloh dơ̆ng ăn dôm bơngai tơmơ̆t jên jang teh đak đe; krao hơvơn dôm bơngai tơmơ̆t jên jang 2 teh đak hơtŏk loi dơ̆ng jang hơdai lơ̆m tơdrong jang mŭk drăm păng tơmơ̆t jên jang ‘moi kiơ̆ pơgơ̆r hop akŏm tĕch mơdro tơmơ̆t jên jang đei hơvơn kơdră chĕp kơ̆l 2 teh đak; krao hơvơn dôm bơngai tơmơ̆t jên jang Việt Nam năm tơmơ̆t jên jang tơ̆ Campuchia lơ hloh dơ̆ng; pơtrŭt dôm bơngai tơmơ̆t jên jang Campuchia tơmơ̆t jên jang lơ̆m Việt Nam vă đei lơ tơdrong jang pơm tơlĕch, tĕch mơdro, trong pơtrŭh tơmam đơ̆ng kơdih.

Găh kơ dih kâu, Thủ tướng Phạm Minh Chính lăng ‘lơ̆ng tơdrong pơgơ̆r hop akŏm; hơlen lăng dôm bơngai tang măt vang truh akŏm tă kơ hơdrin vang tơgop pơm ‘lơ̆ng tơdrong tơbôl păng jang hơdai đơ̆ng 2 teh đak. Hăm Việt Nam kŭm nhen Campuchia, 2 teh đak gô pơm tơdrong hiôk ‘lơ̆ng hloh ăn dôm bơngai tơmơ̆t jên jang. Thủ tướng krao hơvn dôm bơngai tơmơ̆t jên jang akŏm lơ̆m tơplih kơsô̆, mŭk drăm pơdăr, tơmơ̆t jên jang kiơ̆ lơ̆m khoa hŏk kơmăy kơmŏk, tơplih ‘nao pơcheh hơgei, kiơ̆ đơ̆ng noh hơtŏk 2 tơdrong mŭk drăm, vang tơroi băl tơdrong hlôh vao jang hơdai, pơih să hloh dơ̆ng hơnih ăn hơtŏk tơiung.