Pơma tơ̆ lêh pơ gơ̆r pơih blŭng, Phŏ Thủ tướng Trần Hồng Hà pơma hơdăh; Lêh cheh phe Buôn Ma Thuột ‘măng âu ‘noh jĭ tơdrong kăl ‘lơ̆ng hơiă, pơgơ̆r ƀlep lơ̆m năr tơbăt ƀlep 50 sơnăm tơblăh jơnei Buôn Ma Thuột. Lêh ưh khan lăp jing tơdrong pôk pơ ư kơ găr cheh phe Việt Nam đĕch, mă oei jing hop akŏm kơ jơ̆p plei teh, hơnih dôm teh đak pơm tơlĕch păng tĕch cheh phe akŏm, vang tơroi băl trĕng lăng ăn 1 khei ‘năr tơ̆ hơnăp kơnh kơjăp đơ̆ng anih jang cheh phe.

Sơnăm 2024, ‘măng mă blŭng tĕch tơlĕch tơ̆ teh đak đe cheh phe Việt Nam yak hloh 5 ti  USD, hơnơ̆ng pơma hơdăh anih dơ̆ng ‘noh jĭ teh đak pơtruh cheh phe tih hloh mă 2 lơ̆m apŭng plĕnh teh, lăp đơ̆ng rŏng Brazil. Lơ̆m noh, Đắk Lắk - “Tơring jang cheh phe tơm kơ Việt Nam” tơgop dang 18% jên tĕch tơ̆ teh đak đe. Phŏ Thủ tướng athei: tơ̆ hơnăp kơnh, dôm anih jang, anih tơm, dôm tơring, Khŭl jang cheh phe - ka kao Việt Nam, dôm anih mơdro sa vang tơroi atŭm trĕng lăng tơdrong jang, jang hơdai kơjăp vă pơjing tơring pơtăm cheh phe ‘lơ̆ng; pơjing kơjă kăp gĭt kơjăp ‘lơ̆ng.