Pơgê 28/11, tơ̆ dêh char Quảng Ninh, Anih jang Trung ương Mặt trận Tổ quốc Việt Nam jang hơdai hăm Chính hiệp lơ̆m teh đak Trung Quốc pơgơ̆r tơƀơ̆p tơbôl đơ̆ng Anih jang  Trung ương Mặt trận Tổ quốc Việt Nam hăm Chính hiệp lơ̆m teh đak Trung Quốc păng Anih jang Mặt trận Tổ quốc 7 dêh char kơ Việt Nam hăm Chính hiệp 2 dêh char, tơring pơgơ̆r kơdih kơ Trung Quốc đei atŭm trong sơlam, ‘măng mă 2 sơnăm 2023. Tơdrong jang tơƀơ̆p tơbôl ‘măng mă 2 sơnăm 2023 tôch kơ ‘lơ̆ng lơ̆m ‘măng tơbăt 15 sơnăm pơjing tơdrong pơvei jang hơdai gĭt kăl tôm tơdrong đơ̆ng 2 teh đak, pơtrơp jơnei đơ̆ng tơdrong jang ‘măng mă mônh pơgơ̆r tơ̆ dêh char Vân Nam – Trung Quốc sơnăm 2019. 

Tơ̆ pơlei tơm Hạ Long, dôm bơngai tang măt 2 teh đak vang truh akŏm Năr tơgoăt tơgoăl hơdrĕch hơdrŭng kơ pơlei tơm, vang akŏm dôm tơdrong jang hơiă đei lơ kơmâu joăt joe đơ̆ng dôm hơdrĕch hơdrŭng tơ̆ âu; năm lăng dôm kơdeng tơmam pơdă tơƀôh tơmam OCOP ‘lơ̆ng kơ dêh char Quảng Ninh; . Tơ̆ cham ngôi pơ hiơ̆ Hạ Long, khŭl tang măt vang pơtăm 75 tơnơm ‘long pơkao, yak truh tơbăt 75 sơnăm năr pơjing tơdrong pơvei jang tơbôl Việt Nam – Trung Quốc (18/1/1950 – 18/1/2025).