Dôm tơdrong jang đơ̆ng đe kang ƀô̆ khŭl lĭnh tŏk bŏk jang pơm pơhiôk jơhngơ̆m dôm bơngai tŏk bŏk rok trong brŏk tơ̆ pơlei, tơgop vei sơđơ̆ng trong nơnăm. Kiơ̆ chih jô̆ năr blŭng bơ̆jang kiơ̆ tơdrong jang (2/2/2024), khŭl lĭnh kơpal hlôi asong hloh 4.000 get chai đak, 4.000 che tơngiĕt, 1.200 kĭ ƀum yuăn hơtŭk, 1.500 tŏ hơƀo hơtŭk, 2.500 ƀĕng mi păng tơplih ăn kon pơlei 250 tŏ môk ƀao hiêm ‘lơ̆ng, hăm akŏp kơjă hloh 50 triệu hlak jên đei krao hơvơn đơ̆ng tơpôl chă tơra.

Tơdrong jang “yak hơdai hăm bơngai yak vih vơ̆t tơ̆ trong năr Têt” ‘noh jĭ tơdrong jang ƀĕnh tơdrong ‘lơ̆ng, tơƀôh jơhngơ̆m đon đon “Yua kơ kon pơlei pơvih pơvăn” đơ̆ng bơngai lĭnh Kŏng an kon pơlei Việt Nam, tơgop vang tơgŭm mơmat tat hăm dôm bơngai hơtăih kơ pơlei brŏk sơng Têt, hơdai hăm vei sơđơ̆ng trong nơnăm tơ̆ trong tơm Hồ Chí Minh klĕchTây Nguyên.