Tơchĕng adrol hop akŏm pơgơ̆r đơ̆ng ‘năr 5 truh đĭ ‘năr 7/7, pơdrơ̆ng nơ̆r ăn 2 tơdrong tơchơ̆t găh bơngai jang păng hơlen năng, pơdrơ̆ng nơ̆r ăn 22 tơdrong tơchơ̆t ƀơm truh dôm tơdrong tơmât jên jang đơ̆ng tĕh đak, jang mŭk drăm, tơpôl tơ̆ tơring. Găh tơdrong rơih bơngai jang, tang măt ăn Anih vei lăng kon pơlei dêh char Gia Lai, ƀok Trương Hải Long - Kơdră vei lăng kon pơlei dêh char Gia Lai pơre hla ar chih tơroi găh tơdrong pôk ƀok Phạm Minh Trung – Kơdră Anih vei lăng tơmam drăm păng cham char pơm Kơdră vang jang lơ̆m Anih vei lăng kon pơlei dêh char.

Tơdrong pôk rơih đơ̆ng rŏng kơ ‘nŏh, ƀok Phạm Minh Trung iŏk đei tơdrong lui, hăm kơ phĭu tơgŭm truh 62/63 hlak kơphĭu. Tơchĕng adrol, lơ̆m hop akŏm âu âu, Jơnŭm pơgơ̆r kon pơlei dêh char Gia Lai vă hơlen năng 22 tơdrong tơchơ̆t đơ̆ng Anih vei lăng kon pơlei dêh char Gia Lai. Lơ̆m nŏh đei lơ tơdrong tơchơ̆t gĭt kăl nhen: hơmet ming trong tơmât jên jang kơ tĕh đak sơnăm 2023 đơ̆ng jên mong kơ dêh char; hơmet ming trong tơmât jên jang đunh păh lăp; tơplih ming tĕh bri vă iŏk yoa ăn tơdrong jang nai dơ̆ng nhen vă pơm trong tơƀưh tơring lơ̆m apŭng Kông Chro.

 Tơ̆ pơlei tơm Kon Tum, Jơnŭm vei lăng kon pơlei dêh char Kon Tum hlôi pơgơ̆r blŭng a ‘Măng hop akŏm mă 5, jăl XII, jăl jang 2021-2026. Tơ̆ Hop akŏm, Jơnŭm vei lăng kon pơlei dêh char Kon Tum gô lăng hơlen, dăr lăng hơlen tơdrong bơ̆ jang kơ rim hơnih bơ̆ jang kiơ̆ tơdrong tơchơ̆t; pơma dơnuh, hơlen lăng dơ̆ng tơdrong mŭk drăm-tơpôl 6 khei blŭng sơnăm 2023 păng tơchơ̆t rim tơdrong mă hơnih gơ̆h jang.

Đei pơgơ̆r đơ̆ng năr au truh năr 7/7, ‘Măng hop akom mă 5, Jơnŭm vei lăng kon pơlei dêh char Kon Tum jăl XII, jăl jang 2021-2026 gô lăng hơlen, tơchơ̆t hăm 32 tơdrong mă Hơnih vei lăng kon pơlei dêh char pơtruh ăn tơ̆ hop akŏm, lơ̆m au đei mĭnh ƀar tơdrong jang kăl nhen: Kon jên tơgŭm bơ̆ jang Hơmet ming tơring pơlei oei hăm rim tơring đei tŏ ‘mi kial pơrăm, tơring tơnap tap hloh, tơring sơlam teh đak, kon pơlei mơ̆t oei glăi, bri gĭt kăl lơ̆m dêh char; klăh asong kon jên tơgŭm ăn atŏk tơ iung Hơp tak xah; hơmet ming trong pơgơ̆r vă jang kiơ̆ rim tơdrong jang tơm teh đak sơnăm 2022, 2023 păng trong vă klăh asong kon jên teh đak tơmơ̆t jang sơnăm 2024.