Tơchĕng adrol jơnăr vă bơ̆ jang lơ̆m Hop akŏm mă âu ‘nŏh 29 năr 1 puăt. Tơ̆ Hop akŏm âu, Quốc hội vă set hơlen, pơdrơ̆ng nơ̆r ăn 15 khôi luơ̆t, kăl loi jĭ Luơ̆t tang găn, pĭt unh xa păng dŏng bơngai răm; Luơ̆t hơmet ming, chih tơmăt dơ̆ng 1,2 tơdrong lơ̆m Luơ̆t Ƀao hiêm pơgang; Luơ̆t tang găn tĕch mơdro bơngai (đei chih hơmet); Luơ̆t Công đoàn (đei chih hơmet)… Quốc hội oei vă set hơlen, tơgop nơ̆r ăn 13 kơ luơ̆t, kăl hlŏh jĭ Luơ̆t unh điên (oei chih hơmet); Luơ̆t thây kô pơtho; Luơ̆t Thuê̆ jang xa đei kơ anih tĕch mơdro (oei chih hơmet); Luơ̆t hơmet ming, chih tơmât dơ̆ng 1,2 tơdrong lơ̆m Luơ̆t Kuang kăo.

Tơ̆ Hop akŏm mă 8 Quốc hội oei hơlen năng tơdrong jang atŏk tơiung mŭk drăm, tơpôl, thu mong, tơlĕch jên jang kơ teh đak sơnăm 2024 păng set hơlen, tơchơ̆t trong jang atŏk tơiung mŭk drăm, tơpôl, jên vă thu mong, tơlĕch jang kơ teh đak, trong tơlĕch jên jang trung ương sơnăm 2025; set hơlen dôm hla ar chih găh tơdrong jang tư phap, tang găn xa pơjĭp, tang găn tơdrong yoch păng pơm glăi luơ̆t, sek tơlang nơ̆r pơma athei đơ̆ng bơngai tăh hla.