Đơ̆ng rŏng kơ nơ̆r pơma pơih blŭng hop akŏm đơ̆ng Kơdră Kuô̆k hô̆i Vương Đình Huệ, Thủ tướng Phạm Minh Chính pơre hla ar chih tơroi hơlen năng dơ̆ng dôm tơdrong jang đei mưh bơ̆ jang atŏk tơiung mŭk drăm, tơpôl păng thu mong jên ăn tĕh đak sơnăm 2022; tơdrong bơ̆ jang kiơ̆ trong atŏk tơiung mŭk drăm, tơpôl păng thu mong, tơ lĕch jên jang kơ tĕh đak lơ̆m dôm khei blŭng sơnăm 2023.

Kơdră Anih Trung ương Mặt trận Tổ quốc Việt Nam Đỗ Văn Chiến pơre hla ar chih tơroi nơ̆r pơma, apinh đơ̆ng bơngai tăh hla păng kon pơlei gơih ăn hop akŏm mă 5, Kuô̆k hô̆i jăl XV. Kơdră Anih vei lăng tơdrong hơpơi ‘mĕh đơ̆ng kon pơlei Dương Thanh Bình pơre hla ar chih tơroi dôm tơdrong dăr hơlen, sek tơlang kiơ̆ nơ̆r athei đơ̆ng bơngai tăh hla pơtruh ăn hop akŏm mă 4, Kuô̆k hô̆i jăl XV. Kăl tơrĕk ‘nŏh, Kuô̆k hô̆i vă ‘măn jơ oei đei dơ̆ng til pơgê păng đĭ kơsơ̆ ‘năr 22/5 vă hop akŏm hơdrô̆ pơma nuh găh bơngai jang tih.