Truh akŏm păng pơma pơih blŭng jơ pơm lêh, ƀok Nguyễn Trọng Nghĩa, Kơdră jang lơ̆m Anih tơm Chinh trĭ, Kơdră chĕp kơ̆l Ban Tuyên giáo Trung ương pôk pơ ư dôm tơdrong jơnei mă Radio nơ̆r pơma Việt Nam, dôm Anih Radio, pơdăh tivi dêh char, plt păng rim jơhnơr kăn ƀô̆, bơngai jang lơ̆m Anih Radio Việt Nam iŏk đei khei ‘năr âu ki păng hơiă hăm dôm bơngai chih, grŭp chih đei ƀai, tơdrong tơroi mât lơ̆m Vŏng thi mă hơtuch kơ Tơdrong thi Pơih pơre nơ̆r lơ̆m teh đak ‘măng mă 16.

Ƀok Nguyễn Trọng Nghĩa pơma hơdăh, Radio hơnơ̆ng jĭ 1 lơ̆m dôm tơmam yoa gĭt kăl găh đon tơchĕng đơ̆ng Đảng, teh đak; jĭ gơng tơƀưh đơ̆ng Đảng, Teh đak hăm kon pơlei, jĭ anih vă kon pơlei pơtruh nơ̆r hơlen năng, vei lăng tơpôl. Anih radio athei kơchăng, chih pơchĕh hơgei hlŏh dơ̆ng, tơtom roi tơbăt dôm tơdrong kăl ‘moi kiơ̆ rim tơdrong đei tơ̆ yăn âu lơ̆m tơdrong arih xa tơpôl, bơ̆ jang tơplih ‘nao, hơnơ̆ng năm hơdrol chă hơlen năng dôm tơdrong tih, tơdrong ‘nao, tơdrong pơmat tat kơ teh đak; roi tơbăt trong jang đơ̆ng Đảng, tơdrong tơgŭm, khôi luơ̆t đơ̆ng teh đak hăm đĭ đăng kon pơlei.