Kŭm hăm kơdră chĕp kơ̆l dôm anih tơm păng 2 dêh char Dak Lak, Khánh Hòa, lơ kon pơlei tơ̆ xăh hơtăih yăih Cư Đrăm apŭng Krông Bông păng Cư San, dêh char Dak Lak truh lăng jơnăr gĭt kăl vă pơm trong trong gre âu ‘năi. ‘Nhŏng Trần Hữu Thới, yơ̆ xăh Cư Drăm, apŭng Krông Bông, dêh char Dak Lak, pơma:

“Inh ƀôh tôch hơiă. Trong gre ‘nâu ưh jor jĭ trong tơm gĭt kăl. Tơdrong hơiă dơ̆ng jĭ pơm tơjur ƀiơ̆ jơ yak vih vât, ưh jor tơ̆ hơnăp kơnh gô jang tŏk mŭk drăm pran 'lơ̆ng”

Tơdrong jang pơm trong gre kơdâu hrĕnh Khánh Hòa – Buôn Ma Thuột đei kơ̆l trong pơm tơƀưh hăm trong gre 26 păng trong gre 1, tơring Pơbăh Vân Phong, thĭ xăh Ninh Hòa, dêh char Khánh Hòa; anih mă hơtuch tơƀưh hăm trong gre Hồ Chí Minh trong ver găh Hơlĕch plt Buôn Ma Thuột, dêh char Dak Lak. Akŏm đĭ đăng trong kơjung vă jê̆ 118 km, hăm đĭ đăng jên jang hlŏh 21.900 ti. Lơ̆m nŏh dêh char Khánh Hòa pơm tơ ‘ngla tơmât jên jang truh 32 km, hăm jên jang truh 5.632 ti; Anih tơm vei lăng trong nơnăm pơm tơ ‘ngla tơmât jên jang pơm 37,5 km, hăm kơsô̆ jên truh 9.818 ti, oei đei ‘nŏh dêh char Dak Lak pơm tơ ‘ngla tơmât jên jang. Khei ‘năr bơ̆ jang ming man, pơm trong đơ̆ng khei 6/2023 truh sơnăm 2030 gô pơm đang trong păng tơmât yoa. 

Ƀok Phạm Ngọc Nghị, Kơdră vei lăng kon pơlei dêh char Dak Lak tơroi, akŏm jơhngâm chĕp kơ̆l pơgơ̆r đơ̆ng tơdrong jang ‘nao đei kĭ ăn hloi păng pơtơm tơ chưk pơ ‘ngoăi tĕh, tơƀôh đon pơhnŏng bơ̆ jang tôch ai đơ̆ng tơring: “Găh hơnăp jang đơ̆ng kơdih, dêh char Dak Lak pơkăp hăm Thủ tướng tĕh đak akŏm jơhngâm chĕp kơ̆l pơgơ̆r, athei Anih vei lăng tơdrong jang kŭm hăm dôm anih jang kơ pal, tơring tơrang hơtŏk tơdrong chưk pơ ‘ngoăih tĕh oei đei dơ̆ng, vă pơjao đĭ đăng tĕh pơm trong păng dôm tơdrong kăl ăn anih ming man adrol kơ ‘năr 31/12/2023; pơjing tơdrong hiôk hian vă dôm anih ming man bơ̆ jang, man trong trŏ khei ‘năr hơgăt păng kơjăp ‘lơ̆ng”.

Mưh pơm đang, trong gre kơdâu hrĕnh Khánh Hòa - Buôn Ma Thuột jăl 1 gô tơgop pơm đei trong tơƀưh tơring Tây Nguyên hăm tơring tơter đak dơsĭ găh Pơbăh tơring Tŏk bŏk, tơƀưh hăm dôm trong gre đei (trong gre kơdâu hrĕnh Bắc – Nam găh Hơlĕch, trong Hồ Chính Minh, Trong gre kơsô̆ 1, trong tơter đak dơsĭ), pơm hơtŏk tơdrong đei yoa đơ̆ng dôm trong gre, pơm lăp hăm tơdrong ‘mĕh vă yak vih vât, chơ chuĕn tơmam, pơjing đei jơhngâm pran vă jang tŏk.

Tơdrong jang oei tơgop pơm hơtŏk kơsư̆k pơjei, pơjing tơdrong ‘lơ̆ng vă tơguăt tơring, hơtŏk tơdrong jang hơdoi păng jang tŏk tơ̆ tơring, vang vei kơjăp tơdrong sơđơ̆ng tĕh đak, sut pơngot, tơjur tơnuh hin, dar dĕh bơ̆ jang đei dôm tơdrong jang tơm, gĭt kăl vă atŏk tơiung mŭk drăm, tơpôl kiơ̆ tơdrong Tơchơ̆t đơ̆ng hop akŏm mă XIII kơ Đảng. Hăm kon pơlei tơ̆ dôm tơring hơtăih yăih kơ dêh char Dak Lak păng dôm tơring groi kông găh Pơmât Pơbăh dêh char Khánh Hòa, tơdrong jang pơm trong gre kơdâu hrĕnh Buôn Ma Thuột - Khánh Hòa ‘nŏh jĭ tơdrong jang tôch gĭt kăl, jĭ jơhngâm đon tơrĕk tih đơ̆ng Đảng, Khul kơdră tĕh đak, tŏk hlŏh tơdrong hơpơi ‘mĕh đơ̆ng kon pơlei.

Kŭm hăm trong gre kơdâu hrĕnh Khánh Hòa – Buôn Ma Thuột, ƀlep ƀât ‘măng mă âu oei đei 2 tơdrong jang gĭt kăl đei tơlĕch ‘năi, ‘nŏh jĭ tơdrong jang pơm Trong gre kơdâu hrĕnh Biên Hòa – Vũng Tàu păng Trong dăr 3, plt Hồ Chí Minh. ‘Nâu jĭ 3 tơdrong jang gĭt kăl kơ tĕh đak đơ̆ng anih vei lăng trong nơnăm, akŏm đĭ đăng trong kơjung đơ̆ng 3 jăl trong âu truh 247 km; hăm jên man, pơm 3 tŏ trong âu hlŏh 115 rơbâu ti.

Pơma tơ̆ jơ pơm lêh, tang măt ăn Kơdră chĕp kơ̆l Khul kơdră tĕh đak, Thủ tướng Phạm Minh Chính pơma hơdăh, Hop akŏm Đảng lơ̆m tĕh đak ‘măng mă XIII hơnơ̆ng chih hơdăh tơdrong vă pơm hơmet trong nơnăm kơjăp ‘lơ̆ng, tơƀưh rim tơring, jĭ 1 lơ̆m dôm tơdrong jang tŏk gĭt kăl, lơ̆m nŏh pơ ‘nhŏ jên atŏk tơiung 1,2 tơdrong jang tơm gĭt kăl kơ tĕh đak găh pơm trong. Thủ tướng pơma hơdăh, tơdrong gĭt kăl đơ̆ng 3 tơdrong jang ‘nâu: “Tơdrong gĭt kăl đơ̆ng 3 tơdrong jang đei tơlĕch năr ‘nâu ‘nŏh, dôm tơdrong jang đei jang kiơ̆ trong tơgŭm hơdrô̆ tôch gĭt kăl găh klăih song hơnăp jang, kiơ̆ kơ 'nŏh pơjao ăn tơring pơm anih vei lăng tơdrong jang; iŏk yoa trong mong akŏm jên jang vă pơm trong hơdai hăm jên đơ̆ng Trung ương păng jên tơring; jang kiơ̆ trong chă rơih anih jang vă pơm trong, kiơ̆ đơ̆ng noh pơm tơjur ƀiơ̆ khei 'năr hơmet vă jăh tơlĕch jang tơdrong jang. 3 trong jang âu tôch đei yoa, tơƀôh hơdăh tơdrong trŏ ƀlep đơ̆ng Đảng, tĕh đak mưh tơlĕch trong jang 'nao vă gơ̆h jang kĕh dôm tơdrong jang atŏk tơiung tơm hrơ̆ch 'lơ̆ng, pơm tơƀưh trong nơnăm kiơ̆ tơdrong Tơchơ̆t đơ̆ng Đảng.”

Mă tơpă ăn ƀôh, trong yak vih vât pơma atŭm păng trong gre kơdâu hrĕnh, cham gre păr, tơnŏk duk pơma hơdrô̆ hơnhăk ba tơdrong đei yoa tôch ‘lơ̆ng mưh jang atŏk tơiung mŭk drăm, tơpôl. Trong nơnăm pơm truh dang yơ gô pơjing đei tơdrong ‘lơ̆ng vă jang atŏk tơiung mŭk drăm, tơpôl truh dang noh, lơ tơring kơdrâm, tơring jang kơmăy, pơvih pơvăn, chă tơmang lăng đei pơjing, tơdrong iŏk yoa tĕh kŭm roi đei yoa ‘lơ̆ng.