Hơdrol ‘noh, ‘năr dơ̆ng ‘năr 9/9, oh Rơ Châm Ư kŭm hăm oh drŏ nglo sư ‘noh Rơ Châm Chuân (rơneh sơnăm 2015) păng 3 ‘nu buăl sư ‘noh Chúc (rơneh sơnăm 2013), Vâng (rơneh sơnăm 2012) păng H'Lia (rơneh sơnăm 2015) pơtơm băl năm chă ngôi jê̆ hơnih dơnâu đak tơ̆ plei Bui (xăh Nghĩa Hưng). Yua đơ̆ng ‘năr tŏ hŭl hang kơ na 3 ‘nu ‘noh Rơ châm Chuân, Chúc păng H'Lia jur hum tơ̆ dơnâu đak. Ƀơ̆t kơ plăh hum ‘noh pơ đĭ 3 ‘nu đei ƀôh đei glơ̆k kơ đak.

Ƀôh thoi noh, oh Rơ Châm Ư kơ tăh jur tơ̆ dơnâu đak dui đei 3 oh ‘noh Chúc, H’Lia, Rơ Châm Chuân tŏk tơ̆ bơnơ̆. Pơ đĭ 3 ‘nu oh ƀơ̆t đei dŏng tă kơ ưh pă kĕ jăng ngăl bơih, mă lei kiơ̆ đơ̆ng hơmet, oh H’Lia păng Ư đĭ dă ƀiơ̆ bơih. Oei oh Rơ Châm Chuân, oh drŏ nglo Rơ Châm Ư ưh kơ pŭn hlôi lôch yua glơ̆k kơ đak. Đơ̆ng rŏng kơbăt tơdrong jang nuih mơng đơ̆ng oh Rơ Châm Ư, Trung ương Đoàn Hơdruh tơdăm Cộng sản Hồ Chí Minh hlôi tơchơ̆t pơjao Grat “Sơnăm mơlôh nuih mơng” ăn kơ sư.