Lơ̆m tơdrong jang ƀlep ƀơ̆t tơbăt 78 sơnăm năr pơjing, pơgê 07/09, radiô nơ̆r pơma Việt Nam pơgơ̆r pơjao tơmam hơpăh Nơ̆r pơma Việt Nam – Hơ nglŏng khei 9; pôk pơ ư dôm anih jang, bơngai đei tơgop tôch kơ hơgei lơ̆m tơdrong jang “Pran pơdrŏng đơ̆ng đak dơsĭ pơlei pơla” păng tơlĕch jang pơlong yak truh tơbăt 80 sơnăm pơjing. Đei pơgơ̆r rim sơnăm, Tơmam hơpăh Nơ̆r pơma Việt Nam pôk pơ ư dôm bơngai hlôi đei tơgop tơgăl ăn hơnăn “Nơ̆r pơma Việt Nam”. Tơmam hơpăh đei pơjao ăn kơ dôm bơngai pơcheh, grŭp pơcheh đei ƀai chih, tơdrong jang hơgei hloh găh hla ar chih kơtơ̆ng ang, joh ayŏ kơ dŏ soang, ki thuơ̆t, kơ măy kơmŏk, tơchĕng hơlen khoa hŏk; dôm  nghệ sỹ lơ̆m tơdrong jang pơcheh, hơri hơsoang; dôm bơngai pơre nơ̆r hơgei, bơngai chông tơroi tơdrong pơre nơ̆r hơiă. Tơmam hơpăh pôk pơ ư, pơtrŭt tơdrong pơcheh hơgei, tơplih ‘nao lơ̆m rim tơdrong jang đơ̆ng Radiô nơ̆r pơma Việt Nam.

Sơnăm ‘nâu, Radiô nơ̆r pơma Việt Nam pơjao 6 jơnei măih, 9 jơ nei Hu păng 9 jơnei Kong ăn kơ dôm bơngai pơcheh, grŭp pơcheh găh dôm anih jang. ‘Măng âu, Kơdră dơnơm vei lăng Anih radiô nơ̆r pơma Việt Nam pơjao Bằng khen ăn 8 anih jang dôm bơngai đei tơgop hơgei hloh lơ̆m tơdrong jang “Pran pơdrŏng đơ̆ng đak dơ sĭ pơlei pơla”.  Anih jang oei tơ̆ Tây Nguyên iŏk jơnei măih hăm ƀai chih “Đei lơ hơgăt sầu riêng tơ̆ Tây Nguyên- ưh kơ pŭn ai păng tơ jur”, đơ̆ng bơngai chih ƀai Dương Đình Tuấn.