Hăm tơdrong kăl ‘noh jĭ dêh char mơmat tat, lơ kon pơlei kon kông, đơ̆ng sơnăm 1994, ƀơ̆t dêh char Kon Tum đei pơjing dơ̆ng kiơ̆ lơ̆m tơklăh đơ̆ng dêh char Gia Lai- Kon Tum, lơ̆m lơ tơdrong mơmat tat, Anih jang đảng dêh char Kon Tum đei tơdrong tơchơ̆t kơ sô̆ 10, đang kơ ‘noh jĭ tơdrong tơchơ̆t 01 sơnăm 1996, tơchơ̆t 04 sơnăm 2007 hăm trong jang ‘lơ̆ng ‘noh jĭ dôm anih jang pơm ‘nhŏng oh pơjing xăh kon kông, tơring mŭk drăm ‘nao mơmat tat dêh hloh. Ƀok Ka Ba Tơ, sơ̆ pơm Phŏ Bí thư Anih jang Đảng dêh char, sơ̆ pơm Kơdră Jơnŭm pơgơ̆r kon pơlei dêh char Kon Tum tơbăt:

“Đơ̆ng tơdrong tơchơ̆t 10 truh tơdrong tơchơ̆t 01, tơchơ̆t 04 đei kơ jă kăp gĭt păng đei ‘lơ̆ng tôch kơ gĭt kăl. Tơdrong tơchơ̆t pơm ăn kang ƀô̆, đảng viên păng kon pơlei akŏm hơtŏk tơiung mŭk drăm - tơpôl 1 trong pran kơtang păng kơjăp. Mă 2 ‘noh pơjing Đảng pran kơjăp pơm tơdrong tơm kŭm nhen hơnăp jang hơdrol đơ̆ng kang ƀô̆, đảng viên vă chông ba kon pơlei jang kiơ̆ ƀlep dôm tơdrong tơchơ̆t đơ̆ng Đảng, teh đak”.

Jang kiơ̆ dôm tơdrong tơchơ̆t lăng găh tơring, lăng găh tơring bơngai kon kông mơmat tat dêh hloh đơ̆ng Anih jang Đảng dêh char Kon Tum, lơ̆m dôm sơnăm âu ki hlôi đei dôm jĭt rơbâu ‘nu kang ƀô̆ đảng viên dôm tơring kơ dêh char tơklep hăm pơlei pơla “vang sŏng sa, vang hơdai, vang jang” răp mơ̆ng nơ̆r tơroi, hơmet pơ ‘lơ̆ng nơ̆r apĭnh păng ‘meh vă đơ̆ng kon pơlei. Rim kơdră đảng, đảng viên lăng găh tơring, găh bơngai kon kông mơmat tat vă vei lăng hơtŏk tơiung mŭk drăm – tơpôl, hơmet hơtŏk ‘lơ̆ng tơdrong arih sa ăn kon pơlei. Ƀok Dương Văn Trang, Bơngai jang lơ̆m Trung ương Đảng, Bí thư Anih jang Đảng dêh char, Kơdră Jơnŭm pơgơ̆r kon pơlei dêh char Kon Tum pơma hơdăh:

“Hlôi jing kang ƀô̆ đảng viên tơgŭm ŭnh hnam dơnuh hin, ŭnh hnam vă jê̆ dơnuh hin bơngai kon kông rơih iŏk tơdrong jang, trong jang sa vă yak tŏk klăih đơ̆ng dơnuh hin ‘noh năm truh tơ̆ mir, năm truh tơ̆ roh, năm truh tơ̆ pơgar păng bơ̆jang kiơ̆ trong jang “‘mi hngach yôm đunh” păng “chĕp ti yơƀôh tơdrong jang” tơ iung đon hơdrin yak tŏk klăih đơ̆ng dơnuh hin đơ̆ng kon pơlei kon kông. ‘Nâu jĭ 1 lơ̆m dôm hơnăp jang gĭt kăl đơ̆ng rim kang bô̆, đảng viên tơ̆ tơring kon pơlei oei đei lơ bơngai kon kông arih sa.”

Hăm tơdrong jang tơm pơma vă kon pơlei hlôh, jang vă kon pơlei lui, um rup dôm bơngai kang ƀô̆ đảng viên jang tơnăp lơ̆m vei lăng hơtŏk tơiung pơtho pơhrăm, jang pơgang, pơtho kon pơlei pơm trong tơring tơrang, pơtăm ‘long kơsu, cheh phe, hơnhăk kon tơrong lĕch đơ̆ng rih rôm hnam kơjung, hơtŏk tơiung ‘long pơm pơgang... joăt hăm rim kon pơlei, rim pơlei, rim xăh. Ƀok Trương Hồng Doanh, Bí thư Đảng xăh Đăk Kôi, apŭng Kon Rẫy tơbăt, Đảng bộ xăh đei 156 đảng viên, lơ̆m noh đảng viên bơngai kon kông đei hloh 83%. Dôm đảng viên lơ̆m xăh ling lang pơm jŭk yŭk trong hơlâu păng đei kon pơlei lui ‘mêm:

“Dôm đảng viên tơ̆ âu hơtŏk đei tơdrong iung jang hơdrol lơ̆m tơdrong vei sơđơ̆ng tơpôl lơ̆m tơring. Dôm đảng viên kơ dôm chi bộ mă loi ‘noh jĭ đảng viên bơngai kon kông hơnơ̆ng tơroi tơbăt, krao hơvơn kon pơlei ‘nĕ kơ mơ̆ng, ‘nĕ kơ pơm kiơ̆ nơ̆r bơngai kơ nê̆ athei pơdôr. Xăh dang ei ưh pă đei dôm tơdrong joăt so ưh kơ ‘lơ̆ng. 451 ŭnh hnam bơngai kon kông dơnuh hin, vă jê̆ dơnuh hin iŏk yua jơnei dôm kon jên đơ̆ng ŭnh hnam, jên tŏk iŏk vă hơtŏk tơiung mŭk drăm. Truh dang ei dôm ŭnh hnam bơngai kon kông đei hơtŏk tơiung tôch kơ pran.”

Đơ̆ng tơdrong 1 jơhngơ̆m đon đơ̆ng Đảng păng kon pơlei, dêh char Kon Tum hlôi tơ jur đei kơ sô̆ ŭnh hnam dơnuh hin đơ̆ng kơpal kơ 65% khei ‘năr pơjing dơ̆ng dêh char sơnăm 1991 jur oei pă hơla kơ 11% lơ̆m hơtuch sơnăm 2022. Jang đang hloh tơdrong hơgăt đĭ đăng dôm xăh đei trong gre ô tô năm truh tơ̆ anih kơdrơ̆m; tơdrong pơtho pơhrăm đei hơtŏk ‘lơ̆ng; Hnam pơgang dôm xăh tă kơ đei ƀak si ngăl... Hơdai hăm ‘noh ‘noh jĭ pơjing đei khŭl jang chĭnh trĭ pran kơjăp hăm 14 Đảng bộ hăm hloh 31.300 đảng viên. Ƀok Nguyễn Thanh Long, 76 sơnăm, 56 sơnăm đảng oei tơ̆ tổ 4, khối phố 3, thị trấn Đăk Tô, apŭng Đăk Tô, akhan 1 lơ̆m dôm jơnei tih hloh kơ Đảng bộ dêh char Kon Tum ‘noh jĭ hlôi pơtho pơhrăm, pơjing đei khŭl kang ƀô̆ đảng viên bơngai kon kông kơtă anih:

“Khŭl kang ƀô̆ bơngai kon kông hrei ‘nâu đơ̆ng dêh char jur truh tơ̆ apŭng, truh tơ̆ xăh mă khan tam mă pơm lăp đĭ hăm ‘meh vă kach mang ôh mă lei tơdăh kăl đe gơh dơ̆ng đe pơgơ̆r kơtă anih đe pơjing, đe chĕp kơ̆l kon pơlei gơh mă ưh kơ kăl Trung ương năm. Chhôk hơiă ‘noh jĭ tơdrong sơđơ̆ng chĭnh trĭ, sơđơ̆ng tơpôl”.

Đunh kơ âu hloh 2 sơnăm Khŭl kơdră chĕp kơ̆l Anih jang Đảng dêh char Kon Tum hơnơ̆ng pơgơ̆r tơlĕch jang ‘Măng krao hơvơn “Pơm tơplih đon tơ chĕng, trong jang đơ̆ng kon pơlei kon kông, pơm ăn kon pơlei kon kông yak tŏk klăih đơ̆ng dơnuh hin kơjăp”. Đơ̆ng rŏng hloh 2 sơnăm, lơ̆m dêh char Kon Tum đei hloh 6.100 ŭnh hnam klăih đơ̆ng dơnuh hin, rơbâu ŭnh hnam bơngai kon kông hŭt răh dôm tơdrong joăt so ưh kơ ‘lơ̆ng, ưh kơ răp gô, pơ ‘mơ̆ng hơdrin kơdih yak tŏk; băt iŏk yua khoa hŏk ki thuơ̆t lơ̆m jang sa; vă jê̆ 3.600 ŭnh hnam bơngai kon kông vang jang lơ̆m dôm grŭp jang hơdai, hơp tak xăh.... Hăm kon pơlei dôm hơdrĕch kon kông tơ̆ dêh char Kon Tum,  Đảng ling lang tơ jê̆, tơklep ‘lơ̆ng hăm kon pơlei. Đảng viên ‘nao A Niêng, Chi bộ plei Tu Krối, xăh Đăk Kôi, apŭng Kon Rẫy, tơbăt:

“Đei dơ̆ng lơ̆m khŭl jang kơ đảng ĭnh chơt hơiă dêh. Kơdih kâu gô hơdrin đĭ jơhngơ̆m hŏk pơhrăm. Ĭnh hŏk đei tơdrong kiơ ‘lơ̆ng gô vih tơroi ăn kơ kon pơlei, tơgŭm ăn kon pơlei tơ̆ pơlei choh pơtăm, vei rong kon tơrong tơgŭm kon pơlei klăih đơ̆ng dơnuh hin. Pơtho tơƀôh ăn hơdruh tơdăm đei tơdrong jang”.

Đon lui đơ̆ng bơngai Xơ Đăng, Ba Na, Gié- Triêng, Gia Rai, Brâu, Rơ Măm, Hrê tơ̆ dêh char Kon Tum hăm Đảng, Ƀok Hồ hlôi đei pơlong hloh 2 ‘măng tơblăh hŭt ayăt Phalăng păng Mi mơ̆t tơ gar. Lơ̆m tơdrong jang kiơ̆ tơdrong hơgăt kon pơlei pơdrŏng, teh đak pran, kon pơlei pơm tơm, hơtŏ băl, hơgei, Đảng bộ dêh char Kon Tum ling lang đei tơdrong vang yak hơdai hăm đon lui kơjăp hăm Đảng đơ̆ng bơngai Xơ Đăng, Ba Na, Gié- Triêng, Gia Rai, Brâu, Rơ Măm păng Hrê kŭm nhen dôm hơdrĕch kon kông nai dang ei đei hloh 54% kơ sô̆ kon pơlei kơ dêh char.