Ƀlŏk dơ̆ng tơdrong hơiă ƀât dôm năr jơ̆p tơring lơ̆m teh đak tơbăt 78 sơnăm năr Quốc khánh 2/9/2023, klo kăn ƀok Hoàng Minh Lý, 79 sơnăm, thôn 8, xăh sơlam Ea Bung, apŭng Ea Súp oei tôch čhôk ‘nă. Ƀât doh ki, klo kăn ƀok đei Kơđông linh vei lăng ‘măng jang sơlam Đắk Ruê kŭm hăm 1,2 ‘nu bơngai đei đon ‘lơ̆ng hơpăh ăn Hnam “Bơbŭng hnam tơ̆ tơring sơlam” đei kơjă 80 triu hlak jên.

Ƀok tơroi, ƀât đĭ kră krut bơih, đei jĭ jăn hơnơ̆ng dơ̆ng, tơdrong đei hnam man kơjăp ‘lơ̆ng ‘nŏh jĭ tơdrong hơpơi ‘mĕh ưh đei tôch lơ̆m tơdrong arih: “Inh tôch hơiă, hơiă yoa đe linh vei lăng tơring sơlam krao hơvơn dôm bơngai đei đon ‘lơ̆ng vang tơgŭm ăn hnam nhôn, man 1 pôm hnam kơjăp ‘lơ̆ng tơ̆ tơring sơlam. Mưh man hnam đang inh tŏk oei pă đei hli ‘mi hnăt, kial tak kiơ bơih. Inh đei hnam kơjăp ‘lơ̆ng, ‘nŏh jơhngâm pran roi ‘lơ̆ng ƀiơ̆ păng gô arih roi sot hlŏh dơ̆ng.”

Ea Bung jĭ 1 lơ̆m 3 xăh sơlam kơ apŭng Ea Súp. Lơ̆m xăh đei 1.053 unh hnam, hăm hlŏh 4.100 ‘nu bơngai, găh 8 hơdrĕch hơdrung oei xa hơdai. Tơdrong sơđơ̆ng tơ̆ tơring hơnơ̆ng đei vei lăng tôch kơjăp, tơdrong arih xa kơ kon pơlei roi đunh roi tŏk ‘lơ̆ng. Ƀok Trần Thanh Thản, Kơdră Anih Mặt trận Tổ quốc Việt Nam xăh Ea Bung tơroi, gơ̆h đei thoi âu, 1 păh ‘nŏh gơnơm tơdrong tơgŭm đơ̆ng khul linh tơ̆ Kơđông linh vei lăng ‘măng jang sơlam Đắk Ruê:

“Rim sơnăm đe linh tơlĕch lơ tơdrong jang vei lăng sơđơ̆ng teh đak tơ̆ tơring sơlam, păng pơih lơ lăm pơtho ăn kon pơlei, tơgŭm ăn kon pơlei jang xa, rei pơtăm hăm hơdrech ƀa ‘nao, pơtho ki thuơ̆t rong rơmo yŏng. Atŭm hăm ‘nŏh, ƀât năr lêh, têt rim sơnăm khul linh hơnơ̆ng năm ngôi, hơpăh tơmam ăn dôm unh hnam tơnuh, unh hnam đei kŏng vă pơlung đe sư sơng xa têt gơ̆h chơt hơiă ‘nă hal.”

Kơđông linh vei lăng ‘măng jang sơlam Đắk Ruê dang ei oei vei lăng trong sơlam dang 8km păng jrăng sơlam kơsô̆ 42 găh xăh Ea Bung, apŭng Ea Súp, dêh char Đắk Lắk, sơlam hăm dêh char Muldulkiri, teh đak Campuchia. Thượng tá Phạm Đức Khá, Kơdră jang Chinh trĭ Kơđông linh vei lăng ‘măng jang sơlam Đắk Ruê ăn tơbăt, dôm sơnăm âu ki, kŭm hăm tơdrong vei kơjăp tơdrong pơm tơm tĕh đak, tơdrong sơđơ̆ng tơ̆ tơring sơlam, đe kăn ƀô̆, linh tơ̆ kơđông oei pơjing tơdrong arih xa, jơhngâm đon sơđơ̆ng ‘lơ̆ng ăn kon pơlei tơ̆  âu dơ̆ng.

Hăm trong jang, “Kơđông ‘nŏh hnam, tơring sơlam ‘nŏh pơlei, kon pơlei dôm hơdrĕch hơdrung ‘nŏh jĭ ‘nhŏng ŏh pôm mĕ ƀă”, khul linh bơ̆ jang đei yoa ‘lơ̆ng tơdrong jang tơgŭm vei sơđơ̆ng tơdrong arih xa, kiơ̆ đơ̆ng lơ tơdrong jang nhen: Iŏk rong mĕ Việt Nam nuih mơng, "Kon rong kơđông linh vei lăng sơlam teh đak", "chông ba oh năm hŏk", năr pơm ƀĕng chưng, man hnam "Bơbŭng hnam tơ̆ tơring sơlam", tơgŭm ăn lơ trong jang atŏk tơiung mŭk drăm, sut pơđĭ pơngot, tơjur tơnuh hin. Kŭm hăm ‘nŏh, khul linh oei bơ̆ jang, oei xa kơjăp hăm tơring, tơgŭm ăn anih chĕp kơ̆l Đảng, khul kơdră tơring pơm trong, man anih jang pơjing tơring tơrang ‘nao, vang pơjing lơ chi ƀô̆ roi đunh roi pran kơjăp tôm tơdrong, bơ̆ jang đei yoa dôm tơdrong tơgŭm đơ̆ng Đảng, teh đak.

Thượng tá Phạm Đức Khá ăn tơbăt: “Hrei ‘nâu nhôn đei 16 ‘nu đảng viên tơ̆ khul jang vang truh hŏk hôp hơdai hăm 6 chi ƀô̆ tơ̆ dôm pơlei; păng 16 ‘nu kăn ƀô̆ đei pơjao vei lăng dôm unh hnam tơnuh tơ̆ tơring sơlam. Kiơ̆ đơ̆ng khul âu, nhôn hơnơ̆ng pơtho tơƀôh vă gơ̆h băt hơdăh rim tơdrong tơ̆ dôm chi ƀô̆ vă pơgơ̆r jang kiơ̆ dôm tơdrong tơchơ̆t đơ̆ng tơring, pơm thoi yơ vă gơ̆h lăp hăm yăn âu. Kiơ̆ đơ̆ng noh, roi tơƀôh ăn anih jang chĕp kơ̆l đảng tơ̆ tơring vă kŭm hăm tơring pơjing xăh roi đunh roi pran, kon pơlei tơ̆ tơring sơlam roi đunh đei tơdrong arih xa roi phĭ tơtŏ dơnŏ ‘lơ̆ng păng hiôk chơt ƀiơ̆.”

Tơdrong tơgŭm đơ̆ng khul linh vei lăng tơring sơlam vang tơgop ‘lơ̆ng, tơgŭm ăn xăh Ea Bung jing xăh sơlam mă blŭng tơ̆ Đắk Lắk jang kĕh tơdrong pơjing tơring tơrang ‘nao sơnăm 2021. Tơdrong arih xa roi tŏk, kon pơlei roi adrin kŭm hăm khul linh vei lăng tơring sơlam vei kơjăp tơdrong sơđơ̆ng, vei lăng ‘lơ̆ng tơdrong pơm tơm teh đak tơ̆ tơring sơlam.