Tơmam hơpăh chih kơtơ̆ng ang tơring Tây Nguyên ‘măng mă blŭng đei pơgơ̆r, vă hôn bơnê, pôk hơpăh rim bơngai chih đei ƀai chih ‘lơ̆ng, đei chih tơlĕch rapor lơ̆m sơnăm 2023, chih tơbăt găh Tây Nguyên. Đơ̆ng 250 ƀai chih vang pơlong hăm 4 tơdrong kơtơ̆ng ang ‘noh ƀăo in, ƀăo điên tư, rapor păng pơdăh tivi, Khul chĕp pơgơ̆r hlôi rơ̆ih 100 ƀai chih đei chơ̆m hơlen tuch luch. Pơtôch chơ̆m hơlen đei 22 ƀai chih iŏk đei tơmam hơpăh, ‘noh 2 tơmam hơpăh dơ̆ng mă blŭng, 4 tơmam hơpăh dơ̆ng mă ƀar, 6 tơmam hơpăh dơ̆ng mă pêng păng 10 tơmam hơpăh pơchhơp jơhngơ̆m. Rim ƀai vang năm pơlong đei chih ‘lơ̆ng hơ iă. Mĭnh ƀar ƀai chih đei chih tơbăt dôm tơdrong hle, kơđeh tôm tong atŭm hăm lơ trong tơƀôh tơbăt kơtơ̆ng ang, pơjing đei lang să kơtag, pơm ăn lơ bôl boăl đŏk lăp đon. Mă kăl găh tơdrong oei sa joh ayŏ păng dôm tơdrong hơdrin vei răk tơƀăk mong tơdrong oei sa joh ayŏ joăt joe sơ̆ ki kơ khul kơdră rim tơring păng kon pơlei rim hơdrung Tây Nguyên.