Tơ̆ jơ pơm lêh, dôm bơngai tang măt hlôi tơƀlŏk dơ̆ng jăl trong 93 sơnăm ang hơdăh đơ̆ng Đoàn hơdruh tơdăm CS Hồ Chí Minh păng sơnăm mơlôh Việt Nam, mĭnh jơhngơ̆m đon hăm Teh đak, hăm Đảng, lui ngeh lơ̆m tơdrong chĕp kơ̆l pơgơ̆r đơ̆ng Đảng. Hơtŏk ‘lơ̆ng jơhngơ̆m đon ‘mêm kơ teh đak, đon hơdrin đơ̆ng kơdih, chhôk hơiă hơdrĕch hơdrŭng, jơhngơ̆m đon jang tơgŭm yua kơ tơdrong arih sa tơpôl, chu hŭt hơkâu, chu iŏk jang dôm tơdrong ‘nao, tơdrong mơmat. ‘Măng âu, Trung ương Đoàn hlôi pơjao tơmam hơpăh Lý Tự Trọng sơnăm 2024 ăn kơ 100 kang ƀô̆ đoàn gơh hơgei lơ̆m teh đak.

Hơdrol ‘noh, khŭl kang ƀô̆ đoàn hơgei vang truh akŏm tơdrong jang “Tơbăt 93 sơnăm Năr pơjing Đoàn hơdruh tơdăm CS Hồ Chí Minh păng pơjao tơmam hơpăh Lý Tự Trọng sơnăm 2024” hlôi truh soh plang nhang, dan pơkao tơ̆ Hơnih gru groa nhap ƀok Tổng Bí thư Trần Phú, Hơnih ƀlŏk hơdơ̆r kơ lĭnh nuih mơng lôch dŏng teh đak Lý Tự Trọng, Hơnih gru groa Ngã Ba Đồng Lộc.