Kiơ̆ pơkăp jang, truh sơnăm 2050, dêh char Đăk Lăk jing dêh char đei cham char ‘lơ̆ng, joh ayŏ, tơroh, gơh hơgei, jing anih truh tơmang ‘lơ̆ng. Truh sơnăm 2030, dêh char Đăk Lăk jing anih kăp gĭt hơvơn tơmoi lơ̆m teh đak păng đơ̆ng teh đak đe truh tơmang; pơlei tơm Buôn Ma Thuột jing minh anih hơtŏk pran kơ tơring Tây Nguyên, jang hadoi păng tơguăt kiơ̆ trong hiôk hăm tơring păng kơpal teh.

Pơma pơgơ̆r ah Hop akŏm, Phŏ Thủ tướng Trần Hồng Hà sơkơ̆t hơdah, Đăk Lăk đei tơring teh kăp gĭt, đei lơ mŭk drăm cham char, đei um ai joh ayŏ kăp gĭt. Pơkă dêh char Đăk Lăk jing minh hơyak pơm hơdah trong pơkăp jang tih đơ̆ng Anih tơm Chĭnh trĭ lơ̆m Tơchơ̆t kơsô̆ 23 gah hơtŏk jang mŭk drăm – tơpôl păng vei sơđơ̆ng tơpôl teh đak tơring Tây Nguyên truh sơnăm 2030, sơkơ̆t jang truh sơnăm 2045.