Lơ̆m hnam tơ̆r ‘nao hơmet ming đang, yă H’Náp Niê, bơngai Ê Đê (tơ̆ pơlei  Kplang, xah Tân Tiến, apŭng Krông Pắk, dêh char Đăk Lăk) chơt hơ-iă: tôm unh hnam hăm hloh 20 bơngai đei 3 hnưr, 4 unh hnam iĕ, adoi năm oei tơ̆ anih oei ‘nao. Unh hnam yă đei jê̆ 2.000m2 teh oei păng teh pơgar lơ̆m pơkăp teh pơm trong.

Mă blŭng, rim bơngai pơngơ̆t kơ đon kơlih jên hrŭ ưh đei lơ, kơđeh hloh pơtêng hăm tơdrong pơkăp. Mă lei đang kơ noh ƀôh kan ƀô̆ đơ̆ng apŭng năm truh tơ̆ xah, thôn chă tơroi tơbăt hơvơn hơlêm, yă H’Náp Niê adoi hlôh vao hơdah tơdrong kăp gĭt kơ jăl trong tih hăm tơdrong hơtŏk tơ-iung kơ tơring, pơlei pơla: “Hnam inh noh đei teh trŏ pơm trong tih, teh đak athei jăk oei tơ̆ anih nai, noh unh hnam inh pơih pơđĭ hnam so đang kơ noh pơm hnam ah rơvăk teh kơsô̆ 3 âu. Kơlih teh đak pơm trong vih vơ̆t ăn rim bơngai noh nhôn adoi drơ̆ng nơ̆r păng jăk oei tơ̆ âu. Ning mônh kơnh đei jăl trong tih bơih adoi hơpơi ‘meh teh đak pơm trong hiôk hloh ăn kon pơlei jang xa hơtŏk tơ-iung hloh, đei trong nơnăm vih vơ̆t gô tenh kuăng hloh”

Pơlei Kplang jĭ anih oei xa đunh đai kơ kon pơlei Ê Đê. Yă H’Biơi Buôn Yă, Ƀĭ thư chi ƀô̆ pơlei Kplang (xah Tân Tiến, apŭng Krông Pắk) ăn tơbăt, tơdrong tơchơ̆t man jăl trong tih Khánh Hoà- Buôn Ma Thuột găn hơnê̆ pơlei, tơrĕk truh tong hơnê̆ kơsô̆ unh hnam kon pơlei. Lơ bơbŭng hnam kơjăp ‘lơ̆ng hăm pơgar ‘long pơtăm đei kơjă kăp gĭt athei rô̆ hŭt chôk tơmăn vă pơm trong. Mă blŭng, tơdrong tơroi tơbăt, hơvơn kon pơlei pơm kiơ̆ pơkăp hrŭ ‘mong vă iŏk teh noh adoi tơnap tap.

Chŏng mă, tơdrong tơnap tap noh dar deh đei pơklaih ah mă khul kan ƀô̆ apŭng năm truh atŭm hăm kan ƀô̆ xah, thôn atŭm oei xa, chă tơroi tơbăt, pơma dơnuh hăm kon pơlei. Yă H’Biơi Buôn Yă ăn tơbăt: “Mă blŭng noh truh tơroi hăm kon pơlei băt gô đei trong tih, apinh lăng kon pơlei hăm drơ̆ng dah mă ưh. Mă lei tơ̆ pơlei Kplang âu noh lơ unh hnam oei lơ̆m hơgăt teh kăl man trong tih âu, kơjă hrŭ ‘mong trŏ ƀlep, kon pơlei adoi drơ̆ng nơ̆r, iŏk jên hrŭ noh pơm hnam tơ̆ anih nai, răt teh ah anih nai”.

Ƀok Trịnh Minh Tâm, Ƀĭ thư Đảng uỷ adoi jing Kơdră Anih jang vei lăng kon pơlei xah Tân Tiến, apŭng Krông Pắk, dêh char Đăk Lăk ăn tơbăt, jơ̆p xah đei 241 unh hnam kon pơlei ƀơm tơhlăk ah mă jăl trong tih Khánh Hoà- Buôn Ma Thuột đei ming man. ‘Nâu jing tơdrong tơchơ̆t ming man tih hloh, tơrĕk truh lơ unh hnam hloh, mă lei đei kon pơlei drơ̆ng nơ̆r tơnăp păng iŏk teh ming man tenh kuăng hloh: “Hăm xah, tôm anih jang chĭnh trĭ vang chă tơroi tơbăt, rim unh hnam kon pơlei băt hơdah gah trong tơlĕch jang. Kan ƀô̆ kơtă năm truh hŏk hôp kon pơlei, hơvơn kon pơlei vă dah hrôih pơjao teh kăl ming man. Truh khei năr âu 241 unh hnam kon pơlei hlôi pơjao teh kăl ming anih ăn anih iŏk ming man jăl trong”

Tơ̆ “anih tơm sâu riêng” kơ Đăk Lăk, tơring “hơđa teh, kơdeh mah” nhen apŭng Krông Pắk, tơdrong iŏk teh vă ming man tơdrong kăl jing minh tơdrong jang hrat. Pơm thoi yơ vă đei iŏk tơdrong drơ̆ng nơ̆r đơ̆ng kon pơlei, ƀok Trần Hồng Tiến, Ƀĭ thư Huyện uỷ Krông Pắk ăn tơbăt, noh jing tơdrong hơdrin jang, khĭn tơchĕng, khĭn pơm jang păng khĭn pŭ sơnong jang đơ̆ng đe kan ƀô̆: “Tơnap hloh tơ̆ âu noh đei iŏk tơdrong drơ̆ng nơ̆r lơ̆m kon pơlei, pơm thoi yơ gơh iŏk teh ‘măn ming man. Krông Pắk adoi pơngơ̆t kơlih hăm hloh 300ha teh, mă tơm noh teh choh jang xa hăm kơjă tôch kăp. Đei tơm sâu riêng ah sơnăm mă 5-6 lơ̆m minh sơnăm đei yua đơ̆ng 30-40 trĭu hlj. Mă lei kiơ̆ kơjă mă teh đak pơkăp hrŭ noh pơhlom 7 trĭu hlj đĕch. Dang ei pơm thoi yơ vă kon pơlei drơ̆ng nơ̆r, thoi noh nhôn akŏm jơnŭm pơgơ̆r jang kơ apŭng, xah, akŏm dôm khul năm chă tơroi tơbăt hơlêm pơma dơnuh”

Tơguăt hăm kon pơlei, hlôh vao kon pơlei păng khĭn tơchĕng, khĭn pơm jang, chiu pŭ sơnong jang jing dôm tơdrong ƀôh hơdah hăm khul kang ƀô̆, đe kơdră kơpal, đe đảng viên tơ̆ apŭng Krông Pắk, dêh char Đăk Lăk lơ̆m tơdrong tơlĕch akŏm teh tơmăn vă ming man jăl trong tih Khánh Hoà- Buôn Ma Thuột. Gơnơm đơ̆ng noh, tơdrong jang hlôi đei iŏk tơdrong drơ̆ng nơ̆r đơ̆ng kon pơlei. Pơkăp đơ̆ng Đảng trŏ jơhngơ̆m đon kon pơlei, tôm kon pơlei tơ̆ dôm pơlei pơla kơ apŭng Krông Pắk adoi chơt hơ-iă plang teh vă Teh đak man jăl trong tih kăl.