Lơ̆m giĕng blŭng Têt Nguyên đán, tơ̆ Dơnŏk duk Tân Cảng - Cát Lái găh Tổng Công ty Tân cảng Sài Gòn hlôi sơng 75 tong duk chơ tơmam drăm tĕch mơdro tơ̆ teh đak đe, dôm tơmam drăm tăh pơdŭ tơ̆ dơnŏk duk au hloh 1 triu tân, tŏk 9% pơtêng hăm sơnăm 2023.

Hơdrô̆ lơ̆m gơmăng năr 30 Têt Nguyên đán 2024 tơlĕch iung jang, dơnok duk hlôi sơng 7 tong duk container. Akŏp tơmam drăm tăh pơdŭ lơ̆m gơmăng tơlĕch jang blŭng puih mak tơ̆ Dơnŏk duk Tân Cảng - Cát Lái dang 105.000 tân tơmam drăm. Hơdrô̆ năr 6 Têt, tơ̆ dơnŏk duk au hlôi đei 190 tơnô̆ tơmam drăm tĕch mơdro tơ̆ teh đak đe hăm kơjă tĕch mơdro tơ̆ teh đak đe đei hloh 9 triu 540.000 dolar, găh lơ tơmam drăm choh jang sa, tơmam drăm pơm hăm ‘long, ka hơdang ... Lơ̆m au, Công ty Tơgoăt mơdro sa Plei teh  chơ 2 container dang 18 tân chehphe pơm tơlĕch ‘lơ̆ng nhen: chehphe pơ ŏ, chehphe ƀoh, chehphe ƀum trou, chehphe plei nhau... năm tơ teh đak Úc.