Đơ̆ng sơnăm 2020 truh dang ei, hăm hơnăp jang ‘noh jĭ kơdră tang măt ăn Singapore tơ̆ pơlei tơm HCM, ƀok Kho Ngee Seng Roy ling lang hơdrin lơ̆m tơdrong pơm tơdrong hiôk tơgŭm ăn Khŭl kơdră teh đak, anih mơdro sa păng kon pơlei Singapore, tơgop đei 1,5 triệu USD păng dôm tơmam pơgang ăn pơlei tơm HCM ‘moi kiơ̆ Anih mong Vắc-xin kơ Việt Nam.

Hơdai hăm jang hơdai kơjăp hăm dôm anih jang kơ Việt Nam, mă loi ‘noh jĭ pơlei tơm HCM pơgơ̆r lơ tơdrong jang tơbôl kon pơlei 2 pang, lơ̆m noh đei lêh tơbăt 50 sơnăm pơvei jang tơbôl đơ̆ng Việt Nam păng Singapore, 10 sơnăm pơjing pơvei jang hơdai gĭt kăl đơ̆ng 2 teh đak. Ƀok kŭm tơgop pơgơ̆r dôm ‘măng tơƀơ̆p gĭt kăl hăm dôm khŭl tang măt kơdră kơpal, lơ̆m noh đei ‘măng tơƀơ̆p yua đơ̆ng Kơdră tơm teh đak Singapore Halimah Yacob chĕp kơ̆l lơ̆m sơnăm 2022. Dôm tơdrong hơdrin đơ̆ng ƀok hlôi pơtrŭt dôm tơdrong pơvei lơ̆m dôm tơdrong jang mơdro sa, tơmang lăng, pơtho pơhrăm, joh ayŏ păng dôm tơdrong jang hơdai kon pơlei.