Kơdră Kuôk hô̆i Vương Đình Huệ vang truh pơm lêh tơbăt. Pơlei tơm Vinh ‘noh jĭ anih kơdrơ̆m jang mŭk drăm - chĭnh trĭ kơ Nghệ An - pơlei pơla Ƀok Hồ ‘mêm kơ eng păng dôm bơngai jang kach mang sơ̆. Lơ̆m 60 sơnăm âu ki, mă loi ‘noh jĭ lơ̆m 10 sơnăm bơ̆jang kiơ̆ tơdrong Tơchơ̆t kơ sô̆ 26 đơ̆ng Anih tơm chĭnh trĭ găh trong jang, hơnăp jang hơtŏk tơiung dêh char Nghệ An truh sơnăm 2020, pơlei tơm Vinh đei hơyak hơtŏk tơiung tôm tơdrong, hăm lơ jơnei, iŏk yua gĭt kăl. Sơnăm 2022, mŭk drăm tŏk iŏk đei 9,02%; iŏk yua jô̆ păh lăp kơ̆l bơngai đei 120 triệu hlak jên, hloh 2,37 ‘măng jô̆ păh lăp atŭm kơ dêh char.

Hmach thơ thâu kơ tơdrong jơnei pơlei tơm iŏk đei, Kơdră Kuôk hô̆i Vương Đình Huệ athei, dêh char kăl kơ tơtĕnh bơ̆jang kiơ̆ tơdrong jang hăm trong tơlĕch jang, tơdrong jang hơdai Proh hơmet dêh char Nghệ An jăl jang 2021 - 2030 ‘nao kĭ ăn; băt hơdăh trĕng lăng păng tơdrong jang gĭt kăl vă hơtŏk tơiung pơlei tơm Vinh lơ̆m tơdrong pơvei akŏm kơ dêh char Nghệ An păng pơđĭ tơring, bơ̆jang kiơ̆ ‘lơ̆ng chĕng hơmet trong tơm hơtŏk tơiung trong gre tih Vinh - Cửa Lò, pơm tơdrong hiôk hơtŏk tơiung mŭk drăm, jang hơdai dôm tơdrong jang tơm, tơƀưh anih kơdrơ̆m bơ̆jang pơlei tơm păng anih kơ drơ̆m tơmang lăng đak dơ sĭ.