Hrei au, Dơnŏ anih tơm vei lăng Hnam trương pơtho pơhrăm hlôi pơjing 63 khul dăr lăng lăng pơlong, châm ƀai pơlong tơ̆ 63 Hơnih vei lăng Hnam trương Pơtho pơhrăm.

Hơnih tơm jei pơjing 10 khul dăr lăng găh bơ̆ jang hơmet ăn ‘măng pơlong truh tơ̆ 20 tơring lơ̆m teh đak. Găh bơ̆ jang dăr lăng, hơlen lăng bơ̆ jang lăng pơlong tơ̆ tơring, Hơnih tơm vei lăng hnam trương pơtho pơhrăm pơjing 63 khul dăr lăng năm truh tơ̆ 63 Hơnih vei lăng hnam trương pơtho pơhrăm rim dêh char, pơlei tơm (ưh kơjô̆ găh rim khul kơ Hơnih chĕp pơgơ̆r pơrô̆ jang teh đak). Jei kiơ̆ đơ̆ng ƀok Nguyễn Đức Cường, Kơdră chĕp pơgơ̆r Hơnih bơ̆ jang dăr lăng kơ Dơnŏ anih tơm vei lăng Hnam trương pơtho pơhrăm, măt bơngai kang ƀô̆ tŏ sĕt hloh bơ̆ jang dăr lăng hloi lơ̆m jơ ‘năr lăng pơlong tơ̆ Mĭnh hơnih pơlong sơnăm au đei tơdrong tơplih ‘nao kiơ̆ trong trŏ ƀlep hăm tơdrong yan au. Vă sơđơ̆ng ăn bơ̆ jang dăr lăng, lăng hơlen jang kiơ̆ ƀlep tơdrong tơchơ̆t, Dơnŏ anih tơm vei lăng hnam trương pơtho pơhrăm pơgơ̆r rim ‘măng hop akŏm pơtho pơhrăm ăn rim kang ƀô̆ tơm dơnơm găh rim hnam trương đăi hŏk, Hơnih vei lăng hnam trương pơtho pơhrăm rim dêh char pơlei tơm găh bơ̆ jang lăng pơlong, châm ƀai pơlong, đơ̆ng rŏng ‘nŏh khul au jing dôm bơngai tơm vă pơgơ̆r rim ‘măng hop akŏm pơtho pơhrăm tơ̆ tơring.