Hăm trong jang “Tơgoăt tơgoăl, Tơchăr hơgei, vang mơ̆t hơdoi, Plang ăn kơ yuơ tơdrong atŏk tơ iung tôm tong kơ đe hơ ioh, tơgop tơ iung pơjing teh đak pơdrŏng hơnŭk hơnoa” Pơm lêh hop akŏm Kơdră tang măt Khul Vei lăng năng tông hơ ioh Việt Nam ‘măng mă 4 jăl jang 2023-2028 đei pơgơ̆r blŭng a pơgê năr 1/12 tơ̆ Hà Nội.

Vang năm hop akŏm đei 270 ‘nu kơdră tang măt ăn hloh 110.000 ‘nu bơngai lơ̆m teh đak. Jăl jang au ki, Khul vei lăng năng tông hơ ioh Việt Nam păng lơ Khul tơring hlôi hơdrin, iung jang kơtang păng tơchăr hơ iă hăm lơ trong jang vă tơgoăt, akŏm kơtơ̆ng ang kơ đe hơ ioh. Kiơ̆ đơ̆ng noh iung jang chă tơchĕng hơlen, dăr lăng apĭnh jet tơpôl, hop akŏm păng hlôi đei vă jê̆ 40 khul jang tơpôl đei iŏk nơ̆r tơgop hăm vă jê̆ 7.000 ‘măng apĭnh jet. Mă lei, tơdrong jang kơ Khul jăl jang au ki oei tơƀơ̆p tơnap tap, long kơtang. Pơm lêh hop akŏm sơkơ̆t hơdăh gô hơnơ̆ng hơdrin iung jang trŏ lăp hăm tơdrong ƀlep, jang kiơ̆ ‘lơ̆ng Khôi luơ̆t đe hơ ioh păng rim tơdrong tơchơ̆t Khôi luơ̆t đei ƀơm truh tơ̆ đe hơ ioh. Atŭm hăm ‘noh rim tơdrong jang hơdoi đei ƀơm truh găh tang găn hil hơreh teh dong hơ ioh, pơm glăi rim tơdrong pơm tơm kơ dih kơ đe hơ ioh…