Lơ̆m năr bơ̆ jang mă blŭng, Hop akŏm hlôi mơ̆ng đŏk tơbăt Hla bơar chih tơbăt tơdrong jang đơ̆ng Khul kơdră chĕp pơgơ̆r Trung ương Khul kon pơlei choh jang sa Việt Nam jăl VII; mơ̆ng đŏk tơbăt Hla bơar pơtruh ăn găh hơmet ming, tơmơ̆t dơ̆ng Tơdrong pơkăp bơ̆ jang Khul kon pơlei choh jang sa Việt Nam păng trong vă pơjing Tơdrong pơkăp jang Khul kon pơlei choh jang sa Việt Nam hơmet ming; mơ̆ng tơroi tơbăt Tơdrong tơchơ̆t pơjing rim Hơnih tơm pơma dơnuh păng pơtho tơbăt pơma dơnuh.

Năr bơ̆ jang mă blŭng hăm lơ tơdrong jang kăl đei: pôk rơ̆ih Khul kơdră chĕp pơgơ̆r hop akŏm; Khul thư kĭ; Khul hơlen hơnăp pơm kơdră tang măt; hla bơar tơbăt pơtôch dăr lăng gơ̆h pơm kơdră tang măt; pơgơ̆r pơdrơ̆ng kiơ̆ Tơdrong jang kơ Hop akŏm; pơdrơ̆ng kiơ̆ Tơdrong pơkăp bơ̆ jang kơ Hop akŏm. Hơdrol pơgơ̆r bơ̆ jang blŭng a, Kơdră chĕp pơgơ̆r Khul kon pơlei choh jang sa Việt Nam Lương Quốc Đoàn chĕp kơ̆l Khul tang măt vang năm Hop akŏm hlôi năm truh ming gơvang pơkao păng mơ̆t hơpong pơsat Ƀok Hô; soh hlôt nhang tơbăt jơhngơ̆m đon ‘mêm mơnat ăn rim Bơngai nuih mơng, Ƀô̆ đô̆i lôch dŏng teh đak tơ̆ Hơnih man tơbăt Bắc Sơn, Ba Đình, Hà Nội.