Hop akŏm Kơdră kơpal ASEAN-Úc ‘măng mă 3 hôn bơnê tơlĕch jang kiơ̆ Trong pơprŏ iung jang 2020-2024. Lơ̆m sơnăm 2022, akŏm tĕch mơdro dih băl kơ ƀar păh iŏk đei 101 ti USD, lơ̆m mă kon jên tơmơ̆t jang (FDI) kơ Australia lơ̆m ASEAN ‘nŏh hloh 2 ti USD. Thủ tướng Australia Anthony Albanese sơkơ̆t hơdăh, lăng kơjăp ASEAN, pơkăp tơlĕch jang Trong jang hơdoi mŭk drăm Đông Nam Á truh sơnăm 2040, pơjing hơyak pran ăn tơgoăt tơgoăl jang hơdoi tôm tong ASEAN- Australia.

Tơ̆ Hop akom Kơdră kơpal ASEAN-Liên hợp quốc ‘măng mă 13, rim pang tơbăt dih băl tơdrong kăl păng pơkăp atŏk kơtang jang kiơ̆ lơ pang, yom kiơ̆ khôi luơ̆t, atŏk kơtang iung tơjră rim tơdrong long lơ̆m plei teh. Tổng Thư ký Liên hợp quốc Antonio Guterres pơma hơdăh, Liên hợp quốc kăl đei tơdrong vang iung jang hơdoi đơ̆ng rim teh đak nhen ASEAN, păng athei atŏk kơtang jang hơdoi ƀar păh lơ̆m jang kiơ̆ rim trong tơlĕch jang atŏk tơ iung kơjăp ‘lơ̆ng, lơ̆m au lăng kơjăp jang hơdoi tơplih ŭnh hơyuh, pơtho pơhrăm kơsô̆, jang pơgang, bơ̆ jang, vei lăng năng tông bri ‘long, vei lăng tang găn tŏ ‘mi kial pơrăm ... Sơkơ̆t hơdăh Việt Nam ‘nŏh teh đak lơ̆m khul hơdrin hloh kơ ASEAN păng Liên hợp quốc, Thủ tướng pơma hơdăh, Việt Nam gô hơnơ̆ng iung jang đĭ ai, tơgop ăn tơdrong jang atŭm kơ Liên hợp quốc, atŏk kơtang vang iung jang rim tơdrong jang vei lăng rơngei hiôk hian, adoi hơdrin jang keh đang ‘lơ̆ng hơnăp jang đei pơjao.

Găh ‘ngoăih hop akŏm, năr 7/9, Thủ tướng Teh đak Phạm Minh Chính hlôi tơƀơ̆p pơma dơnuh hăm Thủ tướng Australia Anthony Albanese păng Kơdră chĕp pơgơ̆r Khul Liên bang Nga, Kơdră jang tơbôl Sergei Lavrov.

Kơsơ̆ ‘năr 7/9/2023, Kơdră chĕp kơ̆l dôm tĕh đak ASEAN păng tĕh đak jang hơdoi vang hôp Pơtôch hop akŏm tih ASEAN ‘măng mă 43 păng dôm hop akŏm đei ƀơm truh păng pơm Lêh pơjao kơchư̆k jang pơm Kơdră ASEAN đơ̆ng Indonesia ăn Lào.

Lơ̆m ƀai iung pơma ƀât iŏk jang kơchư̆k pơm Kơdră pơlơ̆h băl kơ ASEAN sơnăm 2024, Thủ tướng Lào Sonexay Siphandone roi tơbăt hơnăn jang sơnăm ASEAN 2024 ‘nŏh “Hơtŏk tơdrong tơguăt băl păng jang tŏk kơdih”, roi tơbăt dôm tơdrong tơm vă pơ ‘nhŏ jang găh Hơmet kơjăp tơdrong mât mĭnh ƀơ̆r đon, drơ̆ng pôm nơ̆r păng hơnăp jang tơm đơ̆ng ASEAN, tưk tơiung tơdrong pơjing Tơpôl tơguăt băl, jang tŏk kơdih, pran kơjăp păng ‘moi kiơ̆ dôm tơdrong nol, tơdrong tơplih hrĕnh, krê hơmơt tơ̆ tơring.

Đơ̆ng rŏng 3 năr bơ̆ jang tơpăt ‘lơ̆ng, Hop akŏm tih ASEAN ‘măng mă 43 păng dôm Hop akŏm tih nai đei ƀơm truh đei pơgơ̆r đang ‘lơ̆ng. Gơmăng ‘năr 7/9/2023, Thủ tướng Phạm Minh Chính kŭm hăm Khul tang măt ăn Việt Nam lĕch đơ̆ng Indonesia vih tơ̆ tĕh đak, pơtôch ‘lơ̆ng hơiă ‘măng năm bơ̆ jang vang truh Hop akŏm tih ASEAN mă 43 păng dôm Hop akŏm đei ƀơm truh.