Tơ̆ jơ pơma nuh, 2 păh tơchĕng ‘lơ̆ng hơnăp jang đơ̆ng tơring păng dôm trong pơgơ̆r jang đơ̆ng ASEAN tơlĕch. Thượng tướng Hoàng Xuân Chiến pơma hơdăh, Việt Nam vei kơjăp trong jang tơbôl đơ̆ng kơdih, kơchăng, rơngei ‘lơ̆ng; lơ pang, lơ trong jang păng bơ̆ jang găh khul linh kiơ̆ “4 ưh”: ưh đei mât jang lơ̆m Khul linh yơ; ưh đei jang hơdoi hăm tĕh đak ‘nâu vă tơjră tĕh đak to; ưh ăn tĕh đak đe pơm kơđông linh dăh mă iŏk yoa groi tĕh lơ̆m tĕh đak Việt Nam vă tơjră tĕh đak nai; ưh đei iŏk yoa jơhngâm pran păng tơhli hăm khul linh lơ̆m tơdrong pơvei kơ apŭng plenh tĕh.

Khei ‘năr truh, 2 păh vă hơnơ̆ng tưk tơiung tơdrong jang hơdoi, tơm hlŏh jĭ găh dôm tơdrong kăl, hơnơ̆ng hơmet pơ ‘lơ̆ng dôm trong jang hơdoi; hơtŏk tơdrong vang pơtho ăn khul bơngai jang, vang jang hơdoi hăm Khul linh đak dơsĭ, khul linh gre păr đơ̆ng 2 tĕh đak. Hơtŏk tơdrong jang hơdoi lơ̆m dôm tơdrong pran ‘lơ̆ng nhen vei sơđơ̆ng mang, tơplih hăm kơmăy sô̆, khul linh jang pơgang, jang kơmăy pơyoa ăn khul linh, chih pơjing tơdrong hơgăt. Thượng tướng Hoàng Xuân Chiến krao hơvơn Kơdră chĕp kơ̆l Anih tơm vei lăng khul linh tĕh đak Singapore kŭm hăm dôm anih tĕch mơdro Singapore năm tơ̆ Việt Nam vang truh lơ̆m ‘măng Pơdă tơmam Khul linh apŭng plenh tĕh Việt Nam 2024.