Bơ̆ jang tơdrong jang “Pơtăm 1 ti tơm ‘long đơ̆ng 2021-2025” yoa Thủ tướng teh đak tơlĕch, dêh char Lâm Đồng iŏk pơtăm 50 triu tơm ‘long lơ kơloăi. Jô̆ truh đĭ sơnăm 2023, Lâm Đồng pơtăm đei 26,3 triu tơnơm ‘long, iŏk đei 52,5% tơdrong jang. Vă gơ̆h pơtăm đĭ kơsô̆ ‘long đei pơkăp oei đei dơ̆ng, lơ̆m sơnăm 2024, Lâm Đồng vă pơtăm hlŏh 13,6 triu tơnơm tơ̆ jơ̆p tơring lơ̆m dêh char.

Pơma tơ̆ jơ pơm lêh, ƀok Nguyễn Thái Học, Bí thư Đảng kơplăh dang ei kơ dêh char Lâm Đồng pơma hơdăh, rim kơloăi ‘long pơtăm dang ei gô tơgop hơmet pơ ‘lơ̆ng cham char bri brăh, hơtŏk yơ̆p ‘long bri păng tơjră hăm tŏ ‘mi kial tơplih, 1 lơ̆m dôm tơdrong nol tih hlŏh mă kon bơngai oei tơjră. Đơ̆ng rŏng kơ lêh, hlŏh 1.000 ‘nu kăn ƀô̆, bơngai jang ăn teh đak, khul linh, kon pơlei păng tơmoi chă tơmang lăng vang pơtăm truh 2.000 tơnơm ‘long hơngo 3 hlak hla păng 750 tơnơm ‘long mai anh đào tơter trong krang Prenn Đà Lạt.