Vang truh hop akŏm đei hlŏh 300 ‘nu bơngai tang măt dơ̆ng tang ăn 1,2 anih tơm, anih jang kơ Trung ương, kơdră chĕp kơ̆l Anih pơgơ̆r jang găh tơroi tơbăt hăm teh đak đe kơ 63 dêh char, plt lơ̆m teh đak păng Anih chĕp kơ̆l pơgơ̆r khul linh ƀô đô̆i vei lăng tơring sơlam dôm dêh char. Hop akŏm ‘măn lơ jơnăr roi tơƀôh, mơ̆ng 1,2 tơdrong ‘nao lơ̆m Tơdrong tơchơ̆t kơsô̆ 47 đơ̆ng Khul kơdră teh đak găh tơdrong jang đơ̆ng Khul kơdră teh đak truh sơnăm 2030, bơ̆ jang kiơ̆ Nơ̆r tơchơ̆t đơ̆ng Anih tơm Chinh trĭ găh hơnơ̆ng hơtŏk tơdrong ‘lơ̆ng, đei yoa đơ̆ng roi tơbăt hăm teh đak đe lơ̆m chăl ‘nao.

Hop akŏm pơma hơdăh, bơ̆ jang ‘lơ̆ng tơdrong tơroi tơbăt hăm teh đak đe gô tơgŭm ăn bôl boăl lơ̆m apŭng plenh teh hơnơ̆ng băt truh teh đak Việt Nam trŏ hlŏh. Kiơ̆ đơ̆ng noh hlôh vao trŏ găh teh đak, kon bơngai Việt Nam, tơgŭm bơ̆ jang đei trong jang tơbôl xă ‘lơ̆ng, lơ pang lơ̆m tơdrong pơvei păng mât jang hơdoi mŭk drăm hăm apŭng pơlenh teh đơ̆ng teh đak bơ̆n.