Pơma pơtôch Hop akŏm, Kơdră Kuôk hô̆i Vương Đình Huệ tơbăt, Hop akŏm hlôi đei 7 hla ar chih tơroi tơbăt, pơma dơnuh đơ̆ng dôm bơngai pơma tơblang tơ̆ ‘Măng hop akŏm đĭ đăng păng 2 ‘măng hop akŏm tơdrong jang, hloh 40 ƀai chih đơ̆ng dôm grŭp jang, bơngai joăt jang, bơngai jang khoa hŏk. Tơ̆ dôm ‘măng hop akŏm tơdrong jang păng ‘măng hop akŏm đĭ đăng kŭm nhen pơma đam kơdră kơpal hlôi đei hloh 40 nơ̆r tơgop đơ̆ng dôm bơngai pơma tơblang, dôm bơngai jang khoa hŏk, dôm anih mơdro sa păng bơngai tang măt lơ̆m, ‘ngoăih teh đak vang pơma dơnuh, tơroi băl.

Hop akŏm hlôi tơroi nơ̆r pơma đơ̆ng tơpôl mơdro sa ‘moi kiơ̆ bơngai tang măt kơ Lơ khŭl mơdro sa păng Kơmăy kơmŏk Việt Nam (VCCI), đơ̆ng dôm grŭp jang, đơ̆ng kơ tă 1,2 anih mơdro sa vang Hop akŏm; tơroi đơ̆ng dôm bơngai joăt jang lơ̆m teh đak păng teh đak đe; khŭl bơngai pơma tơblang, bơngai tơchĕng hơlen, bơngai hơlen lăng trong jang tơgŭm păng anih jang kiơ̆ tơdrong jang tơgŭm kŭm nhen dôm bơngai sa yua trong jang tơgŭm. Hop akŏm tơ pă hlôi jing 1 hơnih kơtơ̆ng ang lơ trong păng tôm tơdrong. Dôm bơngai tang măt tơroi truh tơdrong ‘lơ̆ng đơ̆ng đei yua tơ pă đơ̆ng hơtŏk rơgoh păng sơkơ̆t hơdăh ‘nâu jĭ trong kăl hloh, tơm nơm lơ̆m hơlen lăng dôm tơdrong jang gĭt kăl, trong tơlĕch jang, tơdrong tơgŭm vă yak truh hơtŏk ‘lơ̆ng jơhngơ̆m pơ jei păng jang tŏk mŭk drăm kơ jăp ‘lơ̆ng.