Pơma tơ̆ jơ hôp mă hơtuch, Kơdră Quốc hội Vương Đình Huệ athei, Quốc hội hơnơ̆ng chĕp vei jơhngâm đon “chih pơjing luơ̆t mă kơchăng, dăr lăng mă đei yoa, đei trong jang tơtom, ‘lơ̆ng vă jang tŏk”, vă kŭm hăm Khul kơdră teh đak, dôm anih jang lơ̆m rim anih jang chinh trĭ bơ̆ jang đei jơnei ‘lơ̆ng tơdrong jang atŏk tơiung mŭk drăm, tơpôl sơnăm 2024 păng đơ̆ng sơnăm 2021-2025, hơnhăk teh đak bơ̆n jang tŏk hrĕnh păng kơjăp.

Tơdrong Quốc hội drơ̆ng nơ̆r ăn Luơ̆t Teh (đei chih hơmet ming), hlôi jang kĕh 1 lơ̆m dôm tơdrong chih pơjing luơ̆t gĭt kăl hlŏh kơ jăl jang Quốc hội XV. Quốc hội kŭm hlôi drơ̆ng nơ̆r ăn Tơdrong tơchơ̆t găh 1,2 trong pơgơ̆r jang, tơdrong tơgŭm hơdrô̆ vă bơ̆ jang dôm Tơdrong jang tơm kơ teh đak. Kiơ̆ kơdră Quốc hội Vương Đình Huệ ‘nâu jĭ 1 hơyak pơtrơp dơ̆ng dôm tơdrong jang dăr lăng đơ̆ng Quốc hội tơ̆ hop akŏm adrol ki. Quốc hội oei ăn klăih song, pơtruh, iŏk yoa vă jê̆ 64.000 ti hlak jên ăn dôm tơdrong jang găh 5 tơdrong tơm: khul linh, vei sơđơ̆ng teh đak, vei lăng teh đak, khoa hŏk kơmăy kơmŏk păng trong nơnăm, lơ̆m noh ‘măn vă jê̆ 58.000 ti ăn 32 tơdrong jang pơm trong gre tơm.