Pơma tơ̆ lêh pơtôch hŏk, Kơdră vei lăng Học viện Chính trị quốc gia Hồ Chí Minh Nguyễn Xuân Thắng hmach chơt hơiă kơ 44 ‘nu hlôi hŏk đang tơdrong pơhrăm, tơroi tơdrong hlôh vao tôch kơ gĭt kăl păng đei lơ tơdrong ‘lơ̆ng, tơgop pơm hơtŏk ‘lơ̆ng lơ̆m tơdrong jang chĕp kơ̆l, pơgơ̆r bơ̆jang kiơ̆ dôm hơnăp jang đei pơjao đơ̆ng kơdih tơ̆ dôm tơring tơ̆ hơnăp kơnh.

Ƀok Nguyễn Xuân Thắng tơƀôh đon lui ngeh hăm dôm tơdrong hlôh vao ‘nao đei hŏk đơ̆ng Lăm hŏk âu, kŭm hăm dôm tơdrong lăng băt lơ lơ̆m yan âu tơdrong jang, dôm bơngai hŏk gô đei dơ̆ng tơdrong ‘lơ̆ng păng jơhngơ̆m hơdrin, ưh kơ pơdơh hŏk pơhrăm hơtŏk ‘lơ̆ng hlôh vao, đon lui chĭnh trĭ, pơm jŭk yŭk trong hơlâu, ưh kơ ‘nhoan mơmat tat, long nol, pơ̆n tơchĕng, pơ̆n jang, pơ̆n tơplih ‘nao, pơcheh hơgei, jang đang hơgei hloh hơnăp jang đơ̆ng kơdih.