Tơdrong đei năng kăl hlŏh jĭ, Kơdră teh đak pơma nuh hăm Khul vei lăng tơdrong pơvei jang tơbôl kơ teh đak Mi, khul đei dang 5.000 ‘nu bơngai jang lơ̆m noh đei lơ bơngai adrol sơ̆ jang chinh trĭ tih, đei bưng ai, đei grih hăm lơ trong jang tơbôl đơ̆ng teh đak Mi.

Gơ̆h pơma ‘măng vang năm truh hăm Giĕng lêh tih APEC păng tơlĕch lơ trong jang hơdoi 2 pang đơ̆ng Kơdră teh đak Võ Văn Thưởng, hơkăn ƀok păng khul tang măt ăn Việt Nam hlôi iŏk đei jơnei tôch ‘lơ̆ng, tơgop pơm hơtŏk anih dơ̆ng đơ̆ng Việt Nam lơ̆m APEC păng apŭng plenh tĕh, hơdai hăm ‘nŏh tơgop ‘lơ̆ng ăn tơdrong tơlĕch jang kiơ̆ Tơdrong tơchơ̆t găh Jang hơdoi gĭt kăl tôm tơdrong Việt Nam-Mi đei Tổng Bí thư Nguyễn Phú Trọng păng Kơdră tơm Joe Biden kĭ pơkăp khei 9 âu ki.