Kiơ̆ tơdrong jang pơgê hei, Quốc hội yơ̆r ti pơdrơ̆ng kiơ̆ 2 luơ̆t ‘noh đei: Luơ̆t ƀao hiêm tơpôl (hơmet ming); Luơ̆t vei lăng, iŏk yua phao kơtoang, chơ ngoi đôh păng tơmam tơgŭm (hơmet ming); Luơ̆t hơmet ming, tơmơ̆t dơ̆ng 1,2 hơpăng đơ̆ng Luơ̆t teh, Luơ̆t Hnam oei, Luơ̆t tĕch mơdro teh, hnam oei kơsô̆, Luơ̆t Dôm anih asong tŏk iŏk jên. Kuôk hô̆i kŭm pơdrơ̆ng kiơ̆ Tơdrong tơchơ̆t găh pơtôch dăr hơlen tơdrong jang “Tơdrong bơ̆jang kiơ̆ Tơdrong tơchơ̆t đơ̆ng Quốc hội găh tơdrong jang tơgŭm jên jang, jên hu tơgŭm Tơdrong jang tơiung ming, hơtŏk tơiung mŭk drăm - tơpôl păng dôm tơdrong tơchơ̆t đơ̆ng Quốc hội găh 1,2 tơdrong jang gĭt kăl teh đak truh đĭ sơnăm 2023”; Tơdrong tơchơ̆t găh apĭnh jet păng tơl nơ̆r apĭnh jet.

Hơdai hăm ‘noh jĭ Tơdrong tơchơ̆t ‘Măng hop akŏm mă 7, Quốc hội jăl XV (lơ̆m noh đei tơdrong hơmet ming trong jang tơmơ̆t jên jang Tơdrong jang tơm teh đak  hơtŏk tơiung mŭk drăm - tơpôl tơring kon pơlei kon kông păng tơring groi kông jăl jang 2021 -2030; tơjur thuê̆ kơjă tŏk, jang kiơ̆ hơmet ming jên khei; trong jang pơdui đunh kla hre hăm jên tŏk iŏk asong dơ̆ng jên jang păng 1,2 tơdrong ƀơm truh tơdrong iŏk yua jên tŏk thu mong jên jang trung ương sơnăm 2023). Kơdră Quốc hội Trần Thanh Mẫn pơma pơtôch ‘Măng hop akŏm mă 7.