Pơgê 26/12, tơ̆ Hà Nội, Anih tơm vei lăng găh pơtho pơhrăm pơgơ̆r jang hơdai hăm Anih tơroi tơbăt Trung ương, Trung ương Đoàn Hơdruh tơdăm cộng sản Hồ Chí Minh pơgơ̆r lêh pơtôch, pơjao tơmam hơpăh tơdrong pơlong trực tuyến “Sơnăm mơlôh hŏk pơhrăm păng pơm kiơ̆ jơhngơ̆m đon tơchĕng Ƀok Hồ’ sơnăm 2023. ‘Nâu jĭ sơnăm mă 9 Tơdrong pơlong đei pơgơ̆r vă tŭn pran tơdrong hŏk pơhrăm păng pơm kiơ̆ jơhngơ̆m đon tơchĕng ƀok Hồ lơ̆m đoàn viên, hơdruh tơdăm,hŏk tro, sinh viên lơ̆m păng ‘ngoăih teh đak.

Tơdrong pơlong sơnăm ‘nâu pơgơ̆r đơ̆ng ‘năr 11/9 truh ‘năr 26/11 kiơ̆ trong pơlong gơvar trực tuyến. Đơ̆ng rŏng hloh 3 khei pơgơ̆r, tơdrong pơlong hlôi sơng đei hloh 2 triệu 100 rơbâu ‘nu bơngai pơlong chih măt vang pơlong. Yak hloh dôm ‘măng pơlong rơih, ‘măng pơlong pơtôch, Khŭl pơgơ̆r rơih iŏk 186 ‘nu bơngai pơlong đei điêm lơ hloh mơ̆t pơlong lơ̆m ‘măng pơlong pơtôch pơrĕng  kơdih lơ̆m teh đak. Tơ̆ lêh pơtôch păng pơjao tơmam hơpăh tơdrong pơlong, 90 ‘nu đei jơnei hơgei hloh đei pơjao dôm jơnei mă Mônh, Ƀar, Pêng păng Puăn. Khŭl pơgơ̆r kŭm pơjao tơmam hơpăh tơpôl ăn kơ 10 anih vei lăng pơtho pơhrăm đei kơ sô̆ hŏk tro vang chih ƀai pơlong lơ hloh.