Pơgơ̆r lơ̆m 5 năr, Anih Juăt jang kơ Kuôk hô̆i tơgop nơ̆r lơ̆m lơ tơdrong kăp gĭt, lơ̆m noh đei tơgop nơ̆r gah tơdrong hơmet iŏk kơphĭu pôk hăm bơngai jang kơchư̆k kơpal kơyuơ Kuôk hô̆i pôk dah mă kĭ pơkăp ah hop akŏm mă 6, Kuôk hô̆i jăl 15. Pơma ah pơtơm hop akŏm, Kơdră Kuôk hô̆i Vương Đình Huệ ăn tơbăt, tơdrong pơm jang noh lơ, tơnap tap, khei năr tŏ sĕt.

Kơdră Kuôk hô̆i pơkăl rim bơngai jang lơ̆m Anih Juăt jang kơ Kuôk hô̆i chĕp vei sơnong jang kơ dôm tơdrong hop akŏm adrol vă tơgop nơ̆r lơ̆m dôm tơdrong kăl vei sơđơ̆ng ăn tơdrong hop akŏm tơnăp hloh. Kiơ̆ tơdrong hơlen lăng tôm tơdrong hơmet păng dôm tơdrong pơtruh ăn Kuôk hô̆i, đơ̆ng rŏng kơ iŏk nơ̆r tơgop đơ̆ng rim bơngai tang măt ăn Kuôk hô̆i, rim Khul tang măt ăn Kuôk hô̆i, Anih Juăt jang kơ Kuôk hô̆i gô tơgop nơ̆r mă hơtuch luch gah tơdrong kăl kơ Hop akŏm mă 6 vă pơtruh ăn Kuôk hô̆i hơlen lăng, drơ̆ng nơ̆r tơ̆ hop akŏm hơmŏ.